Díli, 10 Fevereiru 2026 – Asosiasaun HAK husu Ministeriu Interior (MI) hodi anula teste rekrutamentu ba Ajente PNTL foun tanba hamosu diskriminasaun ho familiarismu no kontra prinsipiu Boa Governasaun iha estadu ida ne’e.
Porta-Voz Marina Galucho, hatete Asosiasaun HAK nu’udar organizasaun non-govermental apresia no rekonese husi Governu no instituisaun relevante ba politika rekrutamentu tanba ne’e organizasaun Direitus Humanus subliña no nota katak rekrutamentu Polisia Nasional Timor-Leste (PNTL) presiza tuir prinsipiu legalidade transparensia no enkuandramentu legal ho vigor.
“Ami apresia no rekoñese esforsu husi Governu no Instituisaun relevante sira ba politika rekrutamentu ida ne’e, maibė hanesan organizasaun direitus umanus ne’ebé tau matan ba asuntu direitus urmanus hakarak subliña katak, rekrutamentu Polisia Nasional Timor-Leste PNTL presiza la’o tuir prinsipiu legalidade, transparénsia, méritu, imparsiátidade, igualidade no oportunidade, tuir prinsipiu direitus umanus no enkuandramentu legal sira neʼebé vigor” Dehan Porta-voz HAK, Marina Galucho, iha Asosiasaun HAK.
Porta-voz hatutan haree ba nesesidade seguransa iha rai laran mak Konsellu Ministru diside hodi loke vaga ba kandidatu foun PNTL liu husi Diploma Ministerial numeru 17/2025, 25 Juñu altera ona ho Diploma Ministerial numeru 37/2025, 10 de Outubro kona-ba rekrutamentu ba ajente Polisia Nasional Timor-Leste (PNTL), rekrutamentu ne’e importante tebes tanba PNTL mak instituisaun seguransa públika neʼebé iha papel estratéjiku atu proteje no garante seguransa ba sidadaun sira nia iha estadu direitu demokrátiku ida ne’e.
Alende iha loron 03 fulan fevereiru tinan 2026 husi komisaun rekrutamentu Polisia Nasional Timor-Leste (PNTL) publika lista jeral ne’ebé kandidatu PNTL foun hamutuk 12.874 nune’e husi numeru ne’e lista aprovadu 10.597 no la aprovadu 2.277, liu husi numeru aprovadu ne’e komisaun rekrutamentu tau prioridade ba 400 hodi pasa ba teste mediku.
“Iha loron tolu fulan Febreiru 2026 liuhusi Komisaun Rekrutamentu PNTL públika lista jeral kandidatu foun ho total rihun sanulu resin rua atus ualu hitu nulu resin haat (12.874). Husi númeru ne’e, iha kandidatu rihun sanulu atus lima sia nulu resin hitu (10.597) mak aprovadu no kandidatu rihun rua atus rua hitu nulu resin hitu (2.277) mak la aprovadu. Husi numeru aprovadu ne’e fo prioridade ba kandidatu atus haat (400)ne’ebé tuir kouta kada munisipiu mak sei ba teste médiku” esplika Marina Galucho.
Entre tantu, situasaun ne’e sai polemika ba públiku no hetan reasaun maka’as husi kandidatu sira tanba konsidera naran aprovadu iha lista, maibe la pasa ba teste mediku, iha indikasaun forti mos lista kadetes foun sira neʼebé aprovadu ba teste mediku maioria oan husi superior PNTL sira husi Komisaun rekrutamentu nia oan sira.
Iha fatin ne’e asosiasaun HAK rekomenda ba Ministeriu Interior (MI) hodi anula rekrutamentu PNTL foun ne’ebé pasa ba teste mediku no husu ba Provedoria Direitus Humanus no Justisa (PDHJ) foti imediatamente halo investigasaun klean ba pratika ne’ebé kontra prinsipiu boa governasaun ne’e.
“Ami rekomenda no husu ba Ministeriu Interior no PNTL imediatamente atu anula dejisaun. Alende ne’e nafatin alerta ba PDHJ imediatamente atu halo investigasaun ne’ebé klean hodi hatene tendensia ba pratika sira ne’ebé kontra prinsipiu Boa Governasaun iha Timor-Leste.” Nia relata
Asosiasaun HAK fiar katak rekrutamentu PNTL neʼebé la’o ho padraun di’ak no kredível sei kontribui ba hari’i forsa polísia ne’ebé profesionaál, disiplina no respeita ba prinsipiu direitu umánus, apresia ba kandidatu kadetes PNTL foun ne’ebé hatudu maturidade ba buka lia los no justisa ho dalan legal iha Republika Demokratiku de Timor-Leste (RDTL)
Jornalista : Aniceto da Silva Dias
