Aileu, 23 Fevereiru 2026 – Presidente Autoridade Munisipiu Aileu (PAM), iha ne’ebé sorumutu ho estrutura autoridade Munisipiu hodi halo preparasaun simu vizita husi Primeiru Ministru Kayrala Xanana Gusmão iha munisipiu Aileu.
Presidente Autoridade Munisipiu Aileu (PAM) João Bosco dos Santos, informa katak enkontru ida ohin hanesan parte importante ida hodi halo preparasaun entre Munisipiu ho parte Ministeriu Administrasaun Estatal, iha ne’ebé hetan partisipasaun husi (SEATOU), alende ne’e mós (MAE), hodi relata dadus ne’ebé prepara husi Autoridade munisipiu hodi apresenta iha ambito vizita Primeiru Ministru (PM) Kay Rala Xanana Gusmão
“Objetivu husi enkontru ida ohin oinsá atu relata dadus sira ne’ebé mak parte autoridade munisipiu prepara hodi aprezenta iha ámbitu vizita ofisial Primeiru Ministru Kayrala Xanana Gusmão, tanba husi vizita ne’e rasik atu observa direitamente projeitu desenvolvimentu sira ne’ebé mak hala’o ona, alende ne’e mós avalia progresu iha infra-estrutura no prestasaun servisu públiku no oinsá envolve autoridade lokál sira, liuhusi avaliasaun hirak ne’e sei determina munisipiu ida ne’ebé mak pronto ona atu tama ba eleisaun municipal iha tinan 2027”, dehan PAM, João Bosco dos Santos, iha salaun I AMA-Aileu, Segunda, 23/02/2026.
Sorin seluk, Sekretariu Estadu Asuntu Toponomia no Organizasaun Urbana (SEATOU), Germano Santa Brites Dias, relata enkontru kordenasaun servisu hamutuk ho estrutura Autoridade Munisipiu Aileu, iha ne’ebé halo preparativu hodi simu vizita husi Kayrala Xanana Gusmão, objetivu husi vizita ne’e rasik hodi halo avaliasaun ba preparasaun hodi simu poder lokal.
Germano haktuir, husi visita ne’e mos sei halo observasaun ba projetu husi Programa Nasional Ba Dezenvolvumentu Suku (PNDS) nune’e mos hare ba rejultadu implementasaun programa merendar eskolar, saude, agrikultura no setor sira seluk.
“iha vizita ofisial ida ne’e, sei observa direita projeitu Programa Nasional Ba Desenvolvimentu Suku (PNDS nomós PDIM, alende ne’e mós haree resultadu munisipiu nian kona-ba implementasaun programa merenda escolar, saúde nomós agrikultura inklui setór relevante sira seluk, tanba vizita ne’e atu halo avaliasaun direita ba autoridade munisipiu Aileu nian kona-ba preparasaun sira hodi hakat ba poder lokal ne’ebé sei akontese iha tinan 2027”.
Tanba SEATOU, husu ba diretor servisu munisipal Jestaun Merkadu no Turizmu Tenek kontrola masimu ba espasu públiku sira no oinsá organiza limpeza jerál hodi kria ambiente ne’ebé mós no organizadu durante vizita ofisial husi xefe governu.
Entre tantu, Vise-Ministru Administrasaun Estatal (MAE), Jacinto Rigoberto, hatete Presidente Autoridade Munisipiu Aileu (PAMA) ho estrutura sira, tenke halo preparasaun masimu hodi simu vizita ofisial ida ne’e, tanba vizita ida ne’e sei permite Primeiru Ministru, atu observa direitamente projeitu desenvolvimentu sira ne’ebé hala’o dau-daun ona iha Munisipiu Aileu.
Iha enkontru avaliasaun ne’e hodi hare liu ba infraestrutura ho prestasaun servisu publiku nian ho autoridade lokal konaba planu dezenvolvimentu munisipiu nian.
“liuhusi avaliasaun ne’e rasik, sei haree liu ba infra-estrutura no prestasaun servisu públiku nian no envolve ho autoridade lokál sira kona-ba planu prioridade sira ba desenvolvimentu munisipiu nian, tanba husi avaliasaun ne’e rasik sei determina munisipiu ida ne’ebé mak prontu ona atu hakat ba poder lokál iha tinan 2027”. Vise-MAE, hakotu.
Tuir observasaun jornalista iha terenu katak, iha sorumutu importante ida ne’e, hetan partisipasaun husi Diretór Jerál Servisu Kooperativu, Autoridade Munisipiu Aileu, Direjente servisu Munisipais, Delegasaun teritoriais, reprezentante Komandante PNTL Aileu, Komandante Eskuarda Aileu-vila, Administrador Posto, Autoridade Komunitariu, Pontu fokal no Xefe Departamentu sira.
Kontribuitor : Zeus News
