Dili, 10 Setembru 2026-Reitór Institutu of Business (IOB), Pedro Barreto Ximenes ba kestaun lista kandidatura ba membru XI Governu Konstitusionál, hodi asume knaar Ministeriu Ensino Superior Siensia no Kultura (MESSK), ne’e kompeténsia husi Primeiru-Ministru nian, maibé nia prontu atu servisu bainhira Primeiru-Ministru fó fiar ba nia
Reitor Institutu Of Bisnis (IOB), Pedro Ximenes hatete, nia la fó komentáriu kona-ba asuntu ne’e tanba daudaun ne’e kontinua hala’o nia knaar hanesan akadémiku
“Ha’u la iha komentáriu ba ida-ne’e. Ha’u hanesan ema akadémiku, ha’u kontinua halo ha’u-nia knaar hanesan ema akadémiku,” dehan Reitor IOB ba jornalsita sira iha kampus IOB fomentu II
Alende, lista kandidatura ba Ministeriu Ensino Superior Siensia no Kultura (MESSK), ida ne’e kestaun polítika husi Partidu Demokrátiku (PD) mak sei deside maibe prontu atu servisu no simu knaar ne’e bainhira fo fiar
“Ba lista ne’e kestaun polítika, partidu demokrátiku mak orsida bele deside. Ha’u hanesan militante Partidu Demokrátiku, se fó fiar ba ha’u, ha’u prontu atu servisu iha knaar ida-ne’e,” nia dehan
Nia haktuir, atu ba kaer knaar ida ne’e desizaun husi Presidente Partidu Demokratiku hodi delega lista ba Xefe Governu nune’e Xefe Governu mak sei foti desizaun.
“Ha’u sente husi ha’u-nia tipu rekor ne’ebé iha, ha’u servisu ona iha area ne’e kleur ona. Maibé desizaun la iha ha’u-nia liman. Desizaun iha partidu nia liman no mós iha Primeiru Ministru nia liman,” nia haktuir
Lista kandidatu na’in 10 ne’e formula hafoin Konselho Superior Partidu Demokrátiku halo reuniaun iha Sede PD, Kolmera, iha 18 Agostu 2026
Iha enkontru ne’e, partidu halo analiza no evaluasaun ba aspeitu oioin molok deside kandidatu potensial ne’ebé sei hato’o ba PM Xanana atu deside.
Kandidatu hirak ne’e mak:
1. Pedro Ximenes – Reitór IOB, – S3 (Doutormentu);
2. Florindo Pereira – S3 (Doutoramentu), eis membru governu no Reitor UNITAL
3. João Martins – S3 (Doutoramentu), dosente no Reitór UNTL;
4. José Boavida Simões – S2 (Mestradu), Xefe Gabinete MESSK;
5. Rosena Martins – S3 (Doutoramentu), dosente UNTL;
6. José Meneses – S2 (Mestradu), Diretór Fundasaun UNPAZ;
7. Teresa Maria de Carvalho – S2 (Mestradu), Asesora MESSK;
8. Cristino Gusmão – S3 (Doutoramentu), Diretór Nasionál no dosente UNPAZ;
9. Filipus Nino Pereira – S2 (Mestradu), Ministru MCI;
10. Agusto Junior Trindade – S2 (Mestradu), Vise Ministru MCI.
Lista ne’e tuir mai sei sai material konsiderasaun ba PM Xanana molok deside naran ida hodi hato’o ba Presidente Repúblika atu nomeia no fó posse atu kaer pasta MESSK
Jornalista: Aniceto da Silva
