DILI, 28 Outubru 2026 — Presidente Autoridade Munisipál Dili (AMD), Francisco dos Santos, informa katak espasu ba hakoi mate iha Semitériu Bekusi besik remata ona. Kondisaun ne’e bele difikulta disponibilidade fatin ba hakoi mate foun sira iha Munisípiu Dili.
“Semitériu Bekusi agora daudaun tama ona ba faze kritiku tanba kapasidade disponivel ba hakoi mate sira besik remata. Prevê katak kapasidade máxima semitériu ne’e sei atinje iha fulan Novembru 2026. Kondisaun ida-ne’e preokupa tebes tanba bele difikulta disponibilidade fatin ba hakoi mate foun sira iha Munisípiu Dili,” dehan Presidente AMD, Francisco dos Santos liu husi komunikadu imprensa iha nia kna’ar fatin Caicoli Dili
Nia hatutan katak, atu responde ba situasaun ne’e, AMD kontinua servisu hamutuk ho autoridade no entidade relevante sira hodi aselera preparasaun ba funsionamentu Semitériu Metinaro, atu garante disponibilidade espasu ba hakoi mate foun sira iha futuru.
“Autoridade Munisipál Dili kontinua servisu hamutuk ho entidade relevante sira atu aselera preparasaun administrativu, tékniku no operasionál ba hahú funsionamentu Semitériu Metinaro, atu responde ba nesesidade atual no futura komunidade nian, hodi aumenta kapasidade ba hakoi mate no evita problema sira ne’ebé bele mosu tanba limitasaun espasu iha semitériu sira,” nia afirma.
Aleinde ne’e, lider munisipál ne’e husu ba komunidade atu konsidera loke fila-fali rate ka kampa família nian ne’ebé eziste ona, maibé tenke halo pedidu autorizasaun tuir regra ne’ebé vigora.
“Atu ajuda responde ba limitasaun kapasidade iha Semitériu Bekusi, Autoridade Munisipál Dili bele autoriza, tuir pedidu husi família no tuir regra ne’ebé vigora, loke fila-fali rate ka kampa família nian ne’ebé eziste ona hodi hakoi membru família ne’ebé foin mate. Medida ida-ne’e aplika ba Semitériu Bekusi, Bidau Santa Ana no Cacaulidun, ho respeitu ba dignidade matebian sira no tuir norma sanitária no dispozisaun legál sira ne’ebé vigora,” nia esplika.
Prezidente AMD ne’e mós husu ba komunidade sira ne’ebé hela iha Munisípiu Dili atu transfere restu mortál husi membru família sira husi semitériu ida ba semitériu seluk ka ba munisípiu seluk, halo pedidu autorizasaun ba Autoridade Munisipál Dili, tuir regra no prosedimentu ne’ebé vigora.
Jornalista: Mateus F. de Deu
