Ermera, 12 Setembru 2026 — IX Governu konstitusional lideradu husi Primeiru-Ministru (PM), Kay Rala Xanana Gusmão, hamutuk ho Ministériu Obras Públikas (MOP), ofisialmente lansa fatuk dahuluk ba projetu reabilitasaun estrada husi Humboe to’o Ermera Lama, ne’ebé liga Humboe ho Ermera Vila Antiga, Munisípiu Ermera.
Projetu ne’e komprende reabilitasaun seksaun estrada ho naruk 5,105.15 metru, husi STA 0+000 to’o STA 5+105.15, lokaliza iha Suku Mertuto Poetete, Postu Administrativu Ermera, Munisípiu Ermera.
Lansamentu fatuk dahuluk ne’e marka hahú ofisial ba implementasaun projetu ne’ebé espera atu hadi’a kondisaun estrada, asesibilidade no konektividade ba komunidade sira iha área refere.
Tuir dadus projetu, kontratu ho númeru SSS/067/MOP-2026 iha durasaun implementasaun 365 loron, ho supervisaun husi Ministériu Obras Públikas (MOP)
Projetu ne’e orsamentu ho montante ne’ebé tuir kontratu hamutuk US$3,348,762.37, no kompaña ne’ebé responsavel ba ezekusaun obra mak SALI-MAGU UNIPESSOAL, LDA (Timor-Leste).
Reabilitasaun estrada Humboe–Ermera Lama ne’e espera bele fasilita movimentasaun ema no transporte merkadoria, no mos hadi’a asesu komunidade ba servisu públiku, merkadu no atividade sosial-ekonómika.
Ho hahú projetu ne’e, komunidade sira espera atu hetan infraestrutura rodoviária ne’ebé seguru no di’ak liután, no bele kontribui ba dezenvolvimentu lokal iha Munisípiu Ermera.
Jornalista: Mateus F. de Deus
