Díli, 6 Fevereiru 2026 – Forum Organizasaun Naun-Governamental Timor-Leste (FONGTIL) nu’udar Mahon ba membru ONG lokál, lamenta aktu familiarismu ne’ebé akontese iha teste ajente PNTL foun iha tinan 2025.
Porta-voz, Esterlita Perreira Araujo hatete, Forum Organizasaun Non-Govermental Timor-Leste (FONGTIL) hanesan komponente ida husi organizasaun sosiedade sivil iha Timor-Leste nune’e hakarak husu IX Governu konstitusional no liu husi Ministeriu Interior (MI) ho Komandu Polisia Nasional Timor-Leste (PNTL) relasiona ho prosesu rekrutamentu ba ajentes membru foun PNTL iha tinan 2025 timor oan barak konkore no tuir prosesu regulamentu rekrutamentu nian.
“FONGTIL hakarak husu ba Governu liuhusi Ministeriu Interior no Komandu PNTL relasiona ho Prosesu rekrutamentu ba membru foun PNTL iha tinan 2025. Timoroan barak mak konkorre iha rekrutamentu refere no tuir hotu prosesu sira hanesan teste eskrita no fiziku liuhusi regulamentu ne’ebé estabelese husi Komisaun Rekrutamentu baze ba Diploma Ministerial N.º 17/2025 de 25 de Junho Regulamento do Concurso Público de Admissão ao Curso de Formação de Agentes da Polícia Nacional de Timor Leste.” Dehan Porta-voz Esterlita Perreira Araujo iha salaun FONGTIL
iha loron 03 fulan Februari 2026, Komisaun Rekrutamentu PNTL liuhusi Porta Voz Sr. Antonio da Luz, Anusiu lista kandidatu kadetes foun ba Publiku liuhusi fontes média Nasional sira iha Timor-Leste ho totál kandidatu rihun sanulu resin rua atus ualu hitu nulu resin haat (12.874).
Alende liu husi publikasaun husi media hatudu numeru kandidatu kadetes PNTL foun lista aprovadu (10.597) no la aprovadu (2.277), husi lista Aprovadu ne’e komisaun rekrutamentu elimina numeru kandidat kadetes PNTL foun 400 mak pasa ba teste mediku.
“Husi númeru ne’e, kandidatu rihun sanulu atus lima sia nulu resin hitu (10.597) mak APROVADU, no kandidatu rihun rua atus rua hitu nulu resin hitu (2.277) mak LA APROVADU. Husi kandidatu aprovadu sira, Komisaun rekrutamentu deside katak iha kandidatu hamutuk atus haat (400) de’it maka sei tuir teste médiku. Kandidatu ho kategoria aprovadu sira seluk sei labele tuir. Husi teste médiku ne’e, karik identifikadu kandidatu balu neʼebé kondisaun saúde la permite mak sei kontaktu kandidatu seluk tuir lista ne’ebé iha.” Nia haktuir
Esterlita Pereira informa, desizaun ida ne’e la justu, diskriminativu no la garantia prátika prinsipiu boa governasaun iha Timor-Leste. Tanba la hatán ba Diploma Ministerial N.º 17/2025 de 25 de Junho hodi la hatán ba Artigu 42 alínea 1 husi Diploma ne’e rasik.
“FONGTIL ho nia Membru sira nafatin deskonfia katak prátika sira ne’e hodi hatán de’it ba Artigu 37 aline A no B ne’ebé fő Prioridade ba Jerasaun Patriota no PNTL ativu nia oan mak bele liu. Maibé Diploma Ministerial N.º 17/2025 de 25 de Junho Tribunal rekursus deklara ona Inkonsituisional.” Nia relata.
Porta-voz relata haree ba aktus sira ne’ebé akontese familiarizmu iha teste rekrutamentu ajente PNTL foun 2025 nune’e FONGTIL ho nia Membru sira ejiji no rekomenda hodi husu Ministeriu Interior no PNTL atu halo esklaresimentu ne’ebé loos kona-ba prosesu rekrutamentu kandidatu kadetes foun.
Entertan Husu Ministeriu Interior no PNTL imediatamente atu anula dezisaun, hodi la fo de’it teste médiku ba kandidatu na’in atus haat (400) maibé fő oportunidade hotu ba kandidatu sira ne’ebé ho kategoria aprovadu ho nune’e la hamosu diskriminasaun iha prosesu rekrutamentu.
FONGTIL hakarak husu ba PDHJ imediatamente atu halo investigasaun ne’ebé kle’an hodi hatene tendénsia ba prátika sira ne’ebé kontra prinsipiu Boa Governasaun. Husu ba Parlamentu Nasionál Komisaun B ne’ebé trata asuntu Negósiu Estranjeiru, Defeza ho Seguransa atu halo fiskalizasaun ba prosesu rekrutamentu ne’ebé iha tendénsia kontra prinsipiu Boa Governasaun.
Jornalista : Mateus Felisberto de Deus
