Díli, 12 Fevereiru 2026 – Core Grup Transferénsia Timor-Leste (CGT-TL) servisu hamutuk ho parseru dezenvolvimentu sira iha Timor-Leste kria aktividade formasaun prinsipal loron rua nian kona-ba politika Salvaguarda labarik sira.
Koordenador Core Grup Transferénsia Timor-Leste (CGT-TL), Jimicarter Moniz dos Reis hatete politika salvagurda labarik importante tebes nune’e organizasaun no sosiedade sivil hodi tau importansia iha nivel alto tanba ne’e presiza implementa iha munisipiu sira no fahe informasaun ba komunidade sira tanba labarik sai importante tebes iha nasaun ida ne’e
“Ita hotu hatene politika salvaguarda labarik nian importante tebes ba Organizasaun sira liu-liu sosiadade sivil oinsa bele tau iha sira-nia organizasaun nune’e bele ba implementa atividade iha Munisípiu hotu hodi fahé formasaun ba komunidade sira oinsa bele tau importansia ba labarik sira nia direitu tanba labarik mak importante tebes ba nasaun ida-ne’e sai hanesan jerasaun foun ba futuru.” Dehan Koordenador Core Grup Transferénsia Timor-Leste Jimicarter Moniz dos Reis, Yayasan HAK
Koordenador, hatutan tanba ne’e presiza tau importansia ba labarik sira nune’e koalia kona-ba direitu labarik nian tanba iha konstituisaun Republika Demokratika Timor-Leste koalia ona, katak labarik sira presiza tau protesaun husi familia, estadu nomos inan-aman rasik
Enkuantu iha formasaun ida ne’e hodi lori boa seguransa ba labarik sira tanba ne’e liu husi Core Grup Transterensia Timor-Leste (CGT-TL) ida ne’e fahe informasaun materia ne’ebé ligadu ho protesaun labarik nune’e membru sira bele fahe iha munisipiu sira
“Ha’u hanoin katak liuhusi treinamentu ka formasaun ida-ne’e atu informasaun sira kona-ba boa seguransa ba labarik sira ne’e importante tebes ba membru sosiadade sivil liu-liu Core Grup Transferénsia Timor-Leste membru rasik oinsa bele uza materia sira ne’ebé ohin sira hetan ba fahe fali iha Munisípiu sira bainhira labarik sira partisipa bele asegura iha baze.” Dehan Koordenador CGT-TL
Koordenador informa liu husi formasaun ne’e bele hasa’e ona membru sira-nia koiñesimentu no kapasidade oinsa bele utiliza manual politika salvaguarda labarik sira tanba ne’e importante tebes ba sosiedade sivíl tantu governu uza sai hanesan padraun ida nune’e bele gia no lao tuir formatu ne’ebé estabelese ona.
Entre tanta iha konvensaun direitu labarik nia prinsipiu 3, la iha diskriminasaun ba labarik sira, atividade labarik nia partisipasaun mos no labarik presiza iha nia identidade ne’ebé los
“Ita haree iha konvensaun diretu labarik nian iha prinsípiu tolu hanesan, ida laiha deskriminasaun ba labarik sira, rua labarik sira tenke partisipa iha atividade hotu-hotu, tolu labarik sira presiza moris iha identidade ne’ebé loos tanba ne’e haree katak importante tebes ba estadu ida-ne’e.” Koordenador haktuir
Koordenador afirma iha formasaun ne’e iha materia importante sira hanesan saida mak definisaun labarik, politika salvaguarda labarik ninian, kona-ba risku halo mitigasaun ba labarik sira iha baze.
Iha atividade ida ne’e realiza husi Core Grup Transferénsia Timor-Leste (CGT-TL) hamutuk ho membru 16 ne’ebé partisipa husi Organizasaun lokal hanesan Raies Hadomi Timor Oan (RHTO) no Radiu Komunidade Difisiensia Timor-Leste (RKDTL), formasaun refere sei hala’o loron rua loron dahuluk kona-ba salvaguarda labarik, loron tuir mai kona-ba politika salvaguarda labarik nian iha Timor-Leste.
Jornalista : Aniceto da Silva
