Díli, 25 Fevereiru 2026 – Akademista dezafia Primeiru-Ministru (PM) Kay Rala Xanana Gusmão atu transforma deklarasaun kona-ba kombate nepotizmu no prevene nepotizmu sai medida politika konkretu, hodi garante instituisaun estadu sira livre husi pratika familiarismu.
Akademista Armindo Moniz Amaral husu ba Primeiru-Ministru (PM), Kay Rala Xanana Gusmão atu la’os de’it ko’alia kona-ba prevene nepotizmu no familiarismu, maibé tenke halo desizaun konkretu atu kombate pratika ne’e iha instituisaun estadu sira iha Timor-Leste
“Nu’udar PM, ita espera atu nia ko’alia liuhosi desizaun sira, nia presija trata desizaun ida hodi prevene nepotizmu nomós kombate nepotizmu iha estadu ida ne’e, tanba nia la’os ema baibain, nia PM iha poder iha rekursu tomak labele ko’alia hanesan fali hanesan sidadaun babain” hateten Akademista Armindo Moniz ba jornalista iha salaun HAK Farol
Primeiru Ministru (PM) iha poder obriga ema moris tuir saida mak estadu hakarak, liu-liu pratika nepotizmu iha instituisaun estadu sira hotu.
Enkuantu Primeiru Ministru (PM) hodi koalia konana desizaun sira no presiza kombate nepotizmu iha instituisaun sira ne’ebé adopta sistema familiarismu iha instituisaun estadu refere
“Nu’udar PM, ita espera atu nia ko’alia liuhosi desizaun sira. Nia presiza trata desizaun ida hodi prevene no kombate nepotizmu iha estadu ida ne’e. Nia la’os sidadaun baibain,” hateten Armindo.
Nia akresenta pratika nepotizmu no kronizmu akontese kuaze iha instituisaun hotu-hotu hanesan dadaun ne’e akontese iha alegasaun pratika nepotizmu iha Polícia Nasional de Timor-Leste (PNTL), ne’ebé dehan iha regulamentu prevé kuota 20% ba oan membru sira.
Tuir nia, iha rai seluk pratika nepotizmu dala barak subar, maibé iha Timor-Leste kazu ida ne’e hanesan aberta no hatudu momos ba públiku.
Armindo Moniz enfatiza katak ko’alia kona-ba kombate nepotizmu la sala, maibé nu’udar xefe governu Primeiru Ministru (PM) tenke prova liuhosi politika no medida konkretu atu hasai pratika familiarismu iha instituisaun hotu-hotu. Se lae, la diferente ho sidadaun sira seluk.
Jornalista : Mateus F. De Deus
