Dili, 16 Abril 2026-Polísia Nasionál Timor-Leste (PNTL) liu husi Komandu Eskuadra Vera Cruz asegura ona sidadaun Xineza ida ho naran Inisiál A ne’ebé halo deklarasaun iha nia konta account tiktok iha média Sosiál kona-ba Osan falsu, ne’ebé Diresaun Servisu Investigativu Kriminal (DSIK) halo apreensaun iha Armazen Bidau Masaur iha loron kuarta (15/04/2026) ne’e.
Iha dader tuku 10.00 ne’e ekipa sekreta asegura sidadaun ne’e iha nia fatin iha Bairo pité no lori kedas nia ba eskuadra Vera Cruz hodi halo deklarasaun, hafoin halo identifikasaun lori kedas ba iha Edifísiu Diresaun Servisu Investigasaun Kriminák (DSIK) Kuartel Jerál PNTL Caicoli hodi halo prosesu investigasaun.
Iha biban ne’e Porta Voz PNTL, Superintendente Xefe Polísia João Belo dos Reis hatete dadaun ne’e Sidadaun Xineza ne’e iha ona Diresaun Servisu Investigasaun Kriminál (DSIK) hodi presta deklarasaun kona-ba video ne’ebé nia esplika kona-ba osan falsu ne’e.
“Ohin ita bolu sidadaun ne’e mai, ita halo prosesu ketak ida ba nia tanba publikasaun ne’ebé nia halo.” Dehan João Belo ba jornalista sira liuhusi Konferénsia Imprensa ne’ebé halo iha Komandu Jerál PNTL Caicoli Kinta ne’e.
Superintendente Xefe Polídia ne’e dehan, Sidadaun A ne’e iha relasaun ho osan falsu ka la iha relasaun, ne’e sei iha hela prosesu investigasaun.
“Dala ida tan ha’u labele tama too klean ne’ebá tanba ne’e hola parte iha segredu justisa horsida ladiak tanba ne’e mak atu klean liu bainhira sira ne’ebé sente buat ne’e la laloos ba justifika iha Tribunál.” Nia informa
Enkuantu João Belo afirma sidadaun ne’ebé halo vídeo virál, polísia bolu halo identifkasaun hodi husu kona-ba nia koñesimentu no relasaun ho osan falsu ne’e.
“Ita bolu mai husu kona-ba nia koñesimentu kona-ba área ida ne’e nia relasaun oinsá ita husu ona informasaun ba nia.” Nia hakotu
Jornalista : Aniceto da Silva
