Dili 21 April 2026-Sekretatiu Estadu Komunikasaun Sosial (SEKOMS) hodi representa IX governu konstitusiona asina kontratu ho Radio Komunidade hamutuk 14, iha Timor laran Tomak hodi fasilita sira nia kobertura ba iha komunidade sira ne’ebé vulneravel sira liu-liu ba asunto sosial sira
Sekretariu Estadu Komunikasaun Sosial (SEKOMS), Expedito Loro Dias Ximenes hatete, kada tinan Governu apoiu osan ba Radio Komunidade sira tanba Radio Komunidade liña frente ba informasaun iha komunidade
“Tinan tinan Governu aloka osan ba apoiu ba Radio Komunidade sira tanba sa, tanba Governu senti katak Radio Komunidade ne’e front liñe katak liña frente ba informasaun iha komunidade tanba ne’e maka bainhira ami halo visita hodi bele hare gestaun Radio Komunidade nian ami sempre husu tutan tanba Radio Komunidade ne’e forma husi komunidade” dehan Sekretariu Estadu Komunikasaun Sosial (SEKOMS), Expedito Loro Dias Ximenes iha Palasio Governu Dili
Alende Radio Komunidade nia atividade ne’ebé halo kobertura iha munisipiu fo atensaun ba atividade agrikultura, joven resistensia, joven Feto potensial no agrikultura sira ne’ebé halo produsaun halo tos halo natar sira ne’e
“maka nia kobertura nia atividade ne’ebé halo iha munisipiu sira ne’e tenke fo atensaun makas liu ba iha atividade agrikultór nian atividade joven resistensia sira nian atividade joven Feto potensial sira nian ho mos atividades ba agrikultór sira ne’ebé halo servisu ne’ebé halo produsaun iha natar iha tos no kos joven sira ne’ebé ke iha talenta ne’ebé diak karik iha musika ne’e bele konvida sira mai fahe esperiensia talk show ne’ebé halo iha estudio Radio komunidade” nia hatete
Nia hatutan, orsamentu ne’ebé Governu fo ba Radio Komunidade ne’e bazeia ba sira nia proposta no la tuir Governu nia hakarak no tuir sira nia relatoriu ne’ebé diak no tuir regra
“Tanba ne’e maka osan ne’ebé Governu fo iha tinan ida ne’e, ne’e bazeia ba sira nia proposta, tantu laos fahe tuir ami nia hakarak lae mais bazeia ba sira nia proposta i nomos sira ne’ebé halo relatoriu ne’ebé diak tuir regra tanba ne’e mak sira mos hetan tuir sira nia proposta, tantu minimu Radio ida hetan seti to ortu mil, atu bele ajuda sira por ezemplu sosa antena karik presiza sosa mixer mikrofon sosa gravador atu bele sira halo gravasaun no mos gestaun administrativu ne’ebé sira bele halo iha sira nia Radio Komunidade” nia Informa
Entretantu Governante ne’e fo mensagen ba jestor Radio Komunidade sira katak osan estadu ne’e osan povu nian tenke Jere ho diak
Iha serin seluk Jestor Radio Komunidade Manufahe, Vasco Da Costa Mendes nia agradese ba IX Governu ne’ebé kontinua apoiu ba Radio Komunidade iha teritoriu Timor laran tomak nune’e dezenvolve mos ba Radio foun sira ne’ebé iha Timor Leste
“Primeiru agradese ba IX Governu ne’ebé mak kontinua apoiu hanesan parseria ho Radio Komunidade sira iha teritoriu laran tomak inklui mos dezenvolve tan Radio komunidade foun sira, entaun ho kontratu ida ohin hodi hametin relasaun entre SEKOMS ho Radio komunidade nune’e bele hasae servisu Radio Komunidade sira nia liu-liu produsaun lokal sira hanesan produsaun notisia ba ita nia maluk leitor sira” dehan jestor Radio Manufahe
Tanba Radio Komunidade ne’e hanesan liña frente ba komunidade tanba ne’e hodi hasae produsaun notisia iha munisipiu sira
Enkuantu liu husi kontratu ne’e hodi bele ajuda Radio komunidade no jornalista sira ne’ebé voluntáriu iha Radio Komunidade hodi halo kobertura no bele atende sira nia preokupasaun lor-loron nian
“Liu husi asina kontratu ne’e esperansa boot ba Radio Komunidade sira hodi bele tulun netik kolega voluntáriu jornalista sira nune’e sira bele hakman netik sira nia servisu balun no bele apoiu sira oinsa maka atu bele atende nesesidade loroloron nian, tanba lor-loron ba halo servisu hanesan jornalista ita mos presiza ita nia nesesidade lorloron” tenik nia
Total orsamentu ne’ebé Governu aloka ba Radio Komunidade sira iha teritoriu Timor laran tomak 240 mill no sira ne’ebé asina kontratu ona sei halo transferensia ba sira konta bankaria
Jornalista : Aniceto Da Silva
