Díli, 10 Juñu 2026 – Notísia di’ak ba ema ne’ebé hadomi múzika. Label gravasaun Zeus Legacy Records, ofisialmente anunsia sira nia projetu kolaborasaun ikus liu ne’ebé halibur talentu joven talentu na’in rua, Nuno Seixas no Cleo Moniz. Kolaborasaun ne’e ho objetivu atu lansa single duet emosionál ida ho títulu “O Peso da Saudade”.
Akordu no anúnsiu projetu ne’e lidera direitamente husi Produtór Ezekutivu Zeus Legacy Records, Eligio Moniz do Rego. Akompaña mós hosi Produtór Vídeo, Mario Pinto ne’ebé sei responsavel ba dezenvolvimentu konseitu vizuál no vídeo múzika sinemátiku ba single ida-ne’e.
Iha ninia deklarasaun, Eligio Moniz do Rego hato’o ninia entuziazmu ba kolaborasaun ida ne’e.
“Ami iha Zeus Legacy Records sempre komprometidu atu eleva talentu joven sira ho karakter forte. Nuno Seixas no Cleo Moniz iha mistura vokál ne’ebé armoniozu no kle’an tebes. Ami fiar katak sira maka figura ne’ebé apropriadu liu atu lori mensajen forte hosi múzika ho títulu ‘O Peso da Saudade’ ba rona-na’in sira,” dehan Eligio.
“O Peso da Saudade” projeta atu sai hanesan múzika ida ne’ebé ho mensajen forte tebes, ne’ebé sei hato’o kona-ba sakrifísiu, domin, no saudade kle’an ba família sira husi imigrante Timor Oan mak serbisu ema nia rain.
Prezensa hosi produtór vídeo iha faze inisiál sira hosi kolaborasaun ida-ne’e mós fó sinál maka’as katak Zeus Legacy Records prepara hela obra arte ida ne’ebé kompletu. La’ós de’it sei oferese kualidade áudiu ne’ebé agradável, maibé single ne’e sei akompaña mós ho vídeo múzika sinemátiku ne’ebé sei vizualiza emosionalmente signifikadu husi múzika ne’e.
Nuno Seixas no Cleo Moniz hato’o sira nia agradesimentu no orgullu hodi hamutuk ho Zeus Legacy Records ba projetu ida ne’e. Sira na’in rua promete sei fó sira-nia performa vokál ne’ebé di’ak liu hodi hato’o sentimentu ‘saudade’ ne’ebé sai hanesan tema prinsipál ba múzika ida ne’e.
Daudaun ne’e, projetu “O Peso da Saudade” tama ona iha faze pré-produsaun no gravasaun. Iha tempu badak rona-nain sei hetan anunsiu ba lansamentu ofisiál ida-ne’e hosi Zeus Legacy Records iha plataforma streaming dijitál oioin.
Jornalista : Mateus de Deus
