Díli, 17 Juñu 2026 — Indústria múzika Timor-Leste prepara-an ba obra-prima vizuál foun ida ne’ebé fresku no sertamente sei sai impresionante. Diskografia Zeus Legacy Records, reprezenta hosi Produtór Vídeo Mario Pinto, anunsia ona ofisialmente kolaborasaun estratéjiku ida ho uma produsaun Samara Pictures hodi produz vídeo múzika ka single hosi kantora foinsa’e Luciana Verdial, ho títulu “Quero-te Perto”.
Prosesu filmajen ba vídeo klip ida-ne’e tuir planu sei hahú iha sábadu oin mai, ho lokalizasaun sira iha fatin turístiku ikóniku oioin ne’ebé namkari iha sidade Dili.
Creative Director Samara Pictures, Taku Oliveira hato’o nia komitmentu maka’as ba projetu ne’e. Nia promete katak vídeo múzika “Quero-te Perto” sei la’ós de’it foka ba nia istória ne’ebé nakonu ho sentimentu domin maibé mós sai hanesan instrumentu promosaun ida ba sidade.
“Ami lakohi hatudu de’it senáriu romántiku sira ne’ebé baibain. Liu fali ida ne’e, Samara Pictures komprometidu atu envolve (storytelling) hosi múzika ne’e ho paizajen furak sidade Dili nian, atu nune’e video clip ne’e mós sai hanesan eventu promosaun ida ba turizmu Dili nian iha palku mundiál,” dehan Taku Oliveira ho optimista.
Iha enkontru finalizasaun konseitu ba video clip ne’e, kantora prinsipál, Luciana Verdial, mós marka prezensa. Enkontru ne’e partisipa mós husi talentu lokál balun ne’ebé sei involve iha atividade shooting hodi hametin liña istória (storytelling) iha video klip refere.
Kolaborasaun ida ne’e entre Zeus Legacy Records no Samara Pictures hein atu hasa’e nivel ba produsaun vizuál múzika nian iha Timor-Leste, enkuantu introdús mós talentu joven no estétika Dili nian ba públiku internasionál.
Ekipa Zeus News
