Dili, 09 Agostu 2026– Polisia Nasionál Timor-Leste (PNTL), liuhusi Diresaun Servisu Investigasaun Kriminal (DSIK), ezekuta mandadu detensaun ho NUC 0029/23. DIBCR, ne’ebé husi Tribunal Judisiál Primeira Instánsia Dili (TJPID), hasoru kondenadu ho inisiál NCJA, ho idade 23 tinan.
Mandadu detensaun ne’e ba kazu relasiona ho krime agravasaun seksual hasoru menoridade, ne’ebé akontese iha tinan 2023, no previstu iha artigu 173 hosi Kódigu Penál Timor-Leste kona-ba “Agravação” ba krime agresaun seksuál, tuir informasaun kona-ba prosesu judisiál refere.
Bainhira simu tiha ezekusaun mandadu, ekipa to’o kedas iha kondenadu nia hela fatin hodi foti no lori ba iha edifísiu Diresaun Servisu Investigasaun Kriminál, Komandu PNTL Caicoli Dili no sei lori Kondenadu ne’e ba kumpri pena iha Prizaun Becora.
Ezekusaun mandadu ne’e hala’o iha Aldeia Au-Hun, Suku Becora, Postu Administrativu Cristo Rei, Munisípiu Dili ne’ebé hasoru kondenadu ho inisiál NCJA atu detein no kumpri pena prizaun tinan 7 (hitu), tuir desizaun husi autoridade judisiál kompetente.
Tanba ne’e autoridade seguransa DSIK-PNTL kontinua komprometidu atu ezekuta mandadu no desizaun judisiál sira, no hala’o servisu investigasaun kriminal ho baze ba lei, respeitu ba direitu umanu no prinsipiu seguransa jurídika.
Jornalista: Mateus F. de Deus
