Díli, 08 Agustu 2026-Kompleta ona loron 40 husi hakotu-is Francisco Guterres “Lú-Olo”, Eis Prezidente Repúblika Demokrátika Timor-Leste, ne’ebé husik memória no legadu importante ba povu Timor-Leste no nasaun. Komemorasaun loron 40 ne’e sai momentu importante ba família, belun, kamarada no povu Timor-Leste atu hamutuk hato’o orasaun no homenajen ba figura nasionál ne’ebé durante nia moris dedika-an ba luta no servisu ba nasaun.
Arserpispo Mertropolitana Arki-Dioseze Dili, Dom Virgílio Kardiál do Carmo da Silva, konsidera Saudozu Antigu Prezidente Repúblika Francisco Guterres Lú Olo nu’udar figura ezemplár ba família no nasaun, liuhusi nia dedikasaun no sakrifísiu durante nia moris tomak ba povu no Timor-Leste.
Tuir nia Saudozu Lú Olo hatudu ona legadu ida ne’ebé boot tebes ba nia familia no nasaun tanba durante nia moris hahu husi nia vida joven nia halo rezisténsia hodi luta kontra invazór tanba nia bá nasaun no povu ida ne’e, too mai iha indepensia nafatin dedika aan hodi kontribui ba prosesu konstrusaun estadu no nasaun hahú asume Prezidente Parlamentu Nasionál, Prezidente Repúblika no Prezidente Partidu ida ne’e hatudu nia domin nafatin ba povu no nasaun ida ne’e liuhusi ezerse funsaun sira ne’e.
“Fuan boot hadomi nia rai ida ne’e Lu Olo nia legadu sira ne’e mak sei kontinua iha familia no povu nia fuan saida mak nia halo ba familia no nasaun. Nia hadomi nia povu hodi sakrifika nia aan ba povu ho nasaun ho fuan”, Dom Virgilio Kardiál do Carmo da Silva hateten iha nia omilia bainhira prezide misa agradesimentu loron-40 ba falesimentu Saudozu antigu Prezidente Repúblika Francisco Guterres Lú Olo iha Igreja katedral Dili.
Dom Virgilio Kardiál do Carmo da Silva hateten, Lú-Olo la’ós de’it figura ne’ebé hadomi nia familia no hadomi de’it nasaun no povu ida ne’e, maibé Saudozu Francisco Guterres Lú-Olo mós hakbesik an ba Maromak liuhusi fiar ne’ebé nia iha.
Arserpispo Mertropolitana Arki Deosese Dili ne’e hateten durante saudozu nia lori nia familia mai misa iha tempu domingu.
Nia lembra iha momentu saudozu sei asume kna’ar hanesan Prezidente Repúblika iha kalan vizilia paskal nia ho espoza mak lee leitura, maibé iha momentu ne’ebá eletrisidade mate nune’e halo seguransa sira paniku, maibé saudozu la paniku no iha situasaun ne’ebé paniku.
Kardiál hatete, haree ba legadu sira ne’ebé saudozu rai hela husu hotu-hotu tenke banati tuir saida mak saudozu halo ona ba familia no povu ida ne’e.
Iha fatin ne’e agradesimentu loron 40 falesimentu Saudozu Francisco Guterres Lú-Olo, Espoza Saudozu Antigu Prezidente Repúblika Francisco Guterres Lú-Olo Cidalia Mouzinho Nobre Guterres iha intervensaun hateten, ho falesimentu Saudozu Francisco Guterres Lú-Olo ne’e midar momentu tristeza boot ba iha familia liu-liu nia espoza no oan sira hotu.
“Falesimentu Saudozu Francisco Guterres Lú-Olo nian mak nu’udar momentu difisil ida mai ami, ne’ebé durante dalan ida ne’e ami sente katak ami la la’o mesak, ita bo’ot sira-nia prezensa, orasaun, liafuan, amizade domin no solidaridade fó forsa ba ami hodi kontinua hamrik no la’o ho esperansa”, nia dehan.
Espoza Cidalia hato’o agradesimentu ba povu Timor-Leste tomak ne’ebé durante ne’e hato’o kondolensia hahú husi Saudozu Francisco Guterres Lú Olo nian falesimentu.
Iha biban ne’e espoza Saudozu Francisco Guterres Lú-Olo, hato’o agradesimentu ba Arserpispo Mertropolitana Arki Deoseze Dili Dom Virgilio Kardiál do Carmo da Silva, Amo sira ne’ebé disponibiliza ona tempu hodi prezide Missa agradesimentu ba loron 40 ba falesimentu Saudozu Francisco Guterres Lú-Olo nian.
Nia mós agrasede ba entidade oin-oin hanesan orgaun soberania haat Prezidente Repúblika, Parlamentu Nasionál, Governu no Tribunál, ne’ebé sempre suporta familia iha tiste hahu husi Saudozu Francisco Guterres Lú-Olo nian mate too seromian loron haat nulu nian.
Nia agrasede ba korpu diploimatiku sira ne’ebé mak rezidente no la rezidente inklui Timor-Leste nian reprezentante misaun Diplomatiku iha rai li’ur ne’ebé fó apoiu solidaeridade ba familia enlutada hahu husi falesimentu Saudozu Francisco Guterres Lú-Olo.
Nia mós lori familia hato’o ba veteranu no kompatriota rezisténsia sira hotu saudozu Lú-Olo inklui kámada oin-oin ne’ebé durante ne’e sempre fo apoiu moral ba familia sira.
Entratantu iha selebrasaun loron haat nulu falesimentu Antigu Prezidente Repúblika Francisco Guterres Lú-Olo família no entidade hala’o atividade kalan reflesaun, hodi hanoin hikas saudozu nia mate, misa agradesimentu ne’ebé hala’o iha Igreja Katedral Dili, hafoin ne’e família hamutuk entidade no komunidade sira ba karii Aifunan iha Saudozu Francisco Guterres Lú-Olo nia rate iha Jardín dos Eróis Metinaru.
Jornalista: Mateus F. de Deus
