Dili, 19 Agostu 2026 — Eis Primeiru-Ministru Rui Maria de Araújo no antiga Ministru Saude ho ekipa, quarta-feira (19/08), ba Sekretariadu Tékniku Administrasaun Eleitoral (STAE) iha Caicoli, Dili, hodi husu informasaun kona-ba kritériu no prosesu eleitoral ba kandidatura Presidente Repúblika.
Rui Maria de Araújo hatete, nu’udar sidadaun iha inisiativa atu hetan informasaun kona-ba prosesu eleitoral ba eleisaun prezidensiál tinan oin.
“Hanesan sidadaun, hau foti inisiativa atu mai husu informasaun kona-ba prosesu eleitoral ba eleisaun prezidensiál tinan oin nian,” hatete Rui Maria de Araújo iha STAE Caicoli
Nia mos hato’o agradese ba Diretor-Jerál STAE, Elviro Fernandes Moniz, ho ekipa, ne’ebé fó esplikasaun kona-ba lei, rekezitu no prosesu kandidatura ba Presidente Repúblika.
Rui Maria dehan, esplikasaun husi STAE sai hanesan baze importante ba nia no ekipa ne’ebé apoia nia, atu prepara ho di’ak tanba iha intensaun atu kandidata an ba Presidente Repúblika ba períodu 2027–2032.
“Hau agradese barak ba Diretor-Jerál STAE hamutuk ho diretor sira, tanba ohin esplika ona prosesu eleitoral tuir lei no regulamentu sira ne’ebé iha. Ida-ne’e sai hanesan baze ida ba hau rasik no ekipa ne’ebé apoia hau atu prepara prosesu intensaun atu kandidata ba Presidente Repúblika,” hatete nia.
Nia subliña katak iha momentu ne’e seidauk konsidera hanesan kandidatura ofisiál, tanba data eleisaun prezidensiál seidauk marka.
Iha fatin hanesan Diretor-Jerál STAE, Elviro Fernandes Moniz, hatete, Sekretariadu Tékniku Administrasaun Eleitoral (STAE) prontu atu fahe informasaun ba sidadaun hotu-hotu ne’ebé iha intensaun atu kandidata an ba Presidente Repúblika, liuliu kona-ba prosesu no enkuadramentu legal.
“Dr. Rui iha intensaun atu kandidata nia an no sira hakarak mai husu informasaun kona-ba rekezitu. STAE aprezenta rekezitu no enkuadramentu legal, no ami disponivel atu fasilita sidadaun Timoroan hotu ne’ebé hakarak hetan informasaun liga ho prosesu kandidatura,” hatete Elviro Fernandes Moniz.
Jornalista : Mateus F. de Deus
