Dili, 30 Setembru 2026 — Atividade Media Tour ne’e lori jornalista sira ba área fronteira no zona rural, ho objetivu atu hametin ligasaun entre média no komunidade, nune’e jornalista sira bele haree no kompriende diretamente realidade, preokupasaun no nesesidade komunidade iha área lokal.
Sekretáriu Estadu Komunikasaun Sosial (SEKOMS), Expedito Loro Dias Ximenes, hatete katak liberdade imprensa fó benefísiu importante ba jornalista no povu Timor-Leste, tanba média iha papel importante hodi habelar informasaun ne’ebé loos no hatudu realidade ne’ebé akontese iha komunidade.
Nia subliña katak jornalista sira presiza kontinua besik komunidade, liuliu iha área fronteira no rural, atu bele rona diretamente esperiénsia, preokupasaun no nesesidade komunidade, no lori lian komunidade nian ba públiku.
Segundo Expedito Loro Dias Ximenes, Governu fó atensaun ba komunikasaun no jornalizmu, tanba jornalista sira sai ponte entre Governu, instituisaun no komunidade.
“Liu husi média, informasaun kona-ba realidade povu bele to’o ba públiku, enkuantu preokupasaun komunidade bele hetan atensaun husi instituisaun kompetente. Tanba ne’e, apoiu Governu la signifika intervensaun ba polítika editorial,” hatete Expedito Loro Dias Ximenes iha nia diskursu durante atividade pelepasan jornalista sira iha SEKOMS, kuarta-feira ne’e
Nia afirma katak Governu sei respeita independénsia média, liberdade jornalista sira no prinsipiu jornalístiku, inklui independénsia no imparsiálidade.
Nia mós alerta kona-ba uza Inteligénsia Artifisiál (IA), ne’ebé bele fó benefísiu ba jornalista sira iha prosesu servisu, maibé mós iha risku ne’ebé presiza komprende no jere ho responsabilidade.
Nia husu ba jornalista no públiku atu uza média sosial no plataforma dijitál ho responsabilidade, liuliu hodi asegura katak informasaun ne’ebé fahe bazeia ba faktu, liu husi prosesu verifikasaun no respeita ética jornalístika.
Prezidente Uniaun Profisional Jornalista Timor-Leste (UPJTL), Horacio Babo, hatete katak organizasaun jornalista haat sei hala’o atividade Media Tour ho apoiu Governu.
Organizasaun hirak-ne’e inklui UPJTL, Asosiasaun Jornalista Timor-Leste (AJTL) no Timor-Leste Press Union (TLPU), ho atividade sei konsentra liuliu iha área fronteira no zona rural.
Horacio Babo dehan, Media Tour ne’e sei aproxima jornalista sira ho komunidade, liuliu iha área rural, atu haree diretamente situasaun no realidade lokal.
“Durante ita nia atividade, jornalista sira sei halo vizita, interasaun no sosializasaun ho lideransa lokal, funsionáriu públiku no komunidade,” nia hatete.
Nia hatutan katak jornalista sira mós sei halo kobertura kona-ba atividade sosial, dezenvolvimentu no dezafiu ne’ebé komunidade sira enfrenta iha área rural.
“Ami hakarak média sai ponte entre komunidade, instituisaun públika no públiku,” nia hatutan.
Atividade ne’e sei envolve jornalista hamutuk 10 husi média online, imprensa eskrita, televizaun no rádio, atu garante cobertura liuhusi plataforma média oioin.
Jornalista sira mós sei sosializa literasia média ba komunidade no funsionáriu, inklui kona-ba asesu, uza no fahe informasaun ho responsabilidade.
Prezidente Asosiasaun Jornalista Timor-Leste (AJTL), Zevonia Vieira, afirma atividade Media Tour sei lori jornalista sira ba Munisípiu Bobonaro no Oe-Cusse, enkuantu TLPU sei hala’o atividade iha Munisípiu Covalima.
Atividade ne’e sei fó atensaun ba preokupasaun komunidade iha área fronteira, inklui setór edukasaun, saúde no asesu ba servisu públiku.
AJTL mós sei hala’o sosializasaun kona-ba seguransa dijitál ba jovem no estudante sira, liuliu iha Munisípiu Bobonaro.
Atividade Media Tour ne’e sei realiza nu’udar parte husi komemorasaun Loron Liberdade Imprensa, ne’ebé sei komemora iha 16 Outubru.
Jornalista: Aniceto da Silva
