Dili, 07 Outubru 2026-Komisariu Comissão Anti Corrupção (CAC), Rui Pereira dos Santos ofisilamente loke sensibilizasaun Lei Nu. 7/2020 – Medidas Prevensaun no Kombate Korrupsaun (sigla portuges MPCC) ba jornalistas nasional sira iha Salaun PAM Munisipiu Dili, Matadoru.
Tema sentral ba sensibilizasaun loron ida mak “Sensibilizasaun Anti-Korrupsaun ba jornalista sira iha Timor-Leste” ho objetivu prinsipal atu hasae koñesimentu no kapasidade jornalista sira nian kona-ba korrupsaun, Lei MPCC, etika jornalistika no mekanismu denunsia kazu korrupsaun.
Komisariu Rui Pereira dos Santos, iha ninian intervensaun ba jornalistas sira nu’udar formandus iha sensibilizasaun durante loron ida ne’e atu jornalista sira bele iha koñesimentu iha seitor justisa, ba dadus sira ne’ebé bele no labele publika, no presija halo konfirmasaun ba fontes kredivel sira iha asuntu prevene no kombate korrupsaun nian.
Komisariu CAC Rui agradese tanba konvite ne’ebé CAC fo sai ba media nasional sira kuaze haruka ninian jornalista sira tuir formasaun loron tomak nian.
“CAC mesak, nia labele halo buat ida oinsa simu no partilha informasaun. Maibe, ita boot maluk media sira mak sai matan no tilun ba Comissão Anti-Corrupção nian,” Katak Komisariu Rui iha ninian intervensaun.
Sensibilizasaun ida ne’e serbisu entre Comissão Anti-Corrupção (CAC) ho Konselhu Imprensa Timor-Leste (KITL) nune’e atu hasae koñesimentu jornalistas ne’ebé haknar-an iha media Nasional Timor-Leste nian atu evita halo violasaun ba segredu justisa iha futuru kona-ba asuntu funu kolektiva Timoroan sira nian kontra krime korrupsaun.
Komisariu Rui subliña ba jornalista sira katak maske Ministerio Publico envoka hotu kazu iha fulan Fevereiru 2026 no la delega hikas fali kazu ruma mai iha CAC.
Maske nune’e, investigador CAC nian kontinua halao averiguasaun ba krimi korrupsaun ne’ebé envolve servidor publiku sira no partisipasaun mos kontinua lao.
“Maske la hetan delegasaun kompetensia husi Ministerio Publiku maibe ita CAC tuir Lei Nu. 7/2020 MPCC iha obrigasaun kontinua halo averiguasaun rekolla provas iha indisus krime korrupsaun. Ita CAC halo partisipasaun ba iha MP. Partisipasaun ita CAC lori nafatin kazu korrupsaun ba iha Ministerio Publico,” dehan Komisariu Rui Pereira dos Santos
Iha sensibilizasaun ne’e, Orador sira husi Komisáriu Adjuntu Rosario Salsinha Araujo, Eis-Komisariu Adjunto no Investigador Senior CAC Augosto Castro no reprezentante Prezidente Konsellu Imprensa Benevides Correia Barros nu’udar formadores aprezenta sira nian materias ba formandus jornalistas sira.
Topiku ne’ebé formadores sira aprezenta mak: 1) Polítika CAC no kordenasaun inter-institusionál, definisaun korrupsaun, fator no kauza sira, no papel média iha prevensaun no kombate korrupsaun no oinsa atu halo denúnsia, 2) Tipu krime korrupsaun tuir Lei MPKK no regra kona-ba konfidensialidade iha publikasaun notísia sira, no 3) Kódigu Étika, Protesaun Legal Jornalista no funsaun Konsellu Imprensa.
Iha atividade sensibilizasaun ne’e, jornalista sira sei hetan informasaun no diskusaun kona-ba konseitu, forma, kauza no impaktu korrupsaun tuir Lei MPKK, papel média iha prevensaun no kombate korrupsaun, etika no integridade iha identifikasaun indikadór risku korrupsaun, abilidade investigasaun, verifikasaun evidénsia no uza kanál ofisiál denúnsia no Kódigu Étika no Protesaun Legal ba jornalista sira iha funsaun Konsellu Imprensa.
Iha oportunidade ne’e, Komisariu CAC Rui konsidera jornalistas nudar matan no tilun ba instituisaun CAC bele mos hato’o denunsia bainhira hetan indisus krime korrupsaun, informasaun ho provas evidensia forte ba krimi korrupsaun mai iha CAC nian.
“Odamatan CAC nian nakloke 24 horas ba ita boot jornalistas sira atu hato’o keixa atraves WA investigador sira nian no liu husi keixa online ne’ebé mak iha. Atu nune’e ita hotu-hotu hamutuk hodi prevene no kombate korrupsaun,” Komisariu CAC Rui haktuir
Jornalista: Aniceto da Silva
