Díli, 06 Outubru 2026 – Associação Informação Comunicação e Tecnologia de Timor-Leste (AICT-TL) hala’o enkontru preliminár ho Ministériu Juventude, Desportu, Arte no Kultura (MJDAK) atu diskute konseitu inisiál programa Sentru Informasaun Juventude (SIJ).
Iha enkontru ne’e, Vise-Prezidente AICT-TL, Eligio Moniz do Rego, ne’ebé akompaña husi Sekretáriu Jerál Domingos Cardoso, aprezenta konseitu programa SIJ ba Diretór Jerál Juventude MJDAK, Mário Tilman ne’ebé akompaña husi Xefe Departamentu Patrimoniu no Gestaun Teknologika Jose Antonio Borges Guterres.
SIJ mak plataforma media komunikasaun dijitál no fatin literasia dijitál ba joven Timor-Leste. Liuhusi SIJ, joven sira bele aprende oinsá asesu, jere, komprende, avalia, no kria informasaun ho matenek no responsavelmente, no mós partisipa ho efetivu iha sosiedade dijitál.
“SIJ sei sai fatin ba joven sira atu aprende baze jornalizmu, hakerek, lee, no kria konteúdu dijitál. Plataforma ne’e mós sei fó informasaun kona-ba atividade joven iha munisípiu ida-idak, no hatudu papél joven feto no mane iha dezenvolvimentu nasionál iha setór hotu,” dehan Eligio Moniz do Rego.
Programa ne’e sei implementa iha Sentru Juventude munisípiu 13 iha Timor-Leste tomak. Joven sira iha munisípiu ida-idak sei hetan formasaun baze jornalizmu no literasia dijitál, no sei sai kontribuidór konteúdu ba plataforma SIJ. AICT-TL sei dezenvolve website SIJ hanesan kontribuisaun ba harii Sosiedade Dijitál iha Timor-Leste, liuliu ba joven sira. AICT-TL mós sei responsabiliza formasaun jestaun website.
Diretór Jerál Juventude, Mário Tilman, simu ho di’ak konseitu kooperasaun ne’e. Nia hatete katak programa SIJ iha potensiál boot atu hasa’e kapasidade joven sira iha era dijitál.
“Ami simu ho di’ak inisiativa ida ne’e husi AICT-TL. Ami sei diskute uluk iha MJDAK laran, no ami espera programa ne’e bele implementa iha tempu badak,” dehan Diretór Jerál Mário Tilman.
Enkontru ne’e remata ho komitmentu husi partes rua atu kontinua koordenasaun no prepara pasu tuir mai ba implementasaun programa Sentru Informasaun Juventude.
Jornalista: Mateus F. de Deus
