Dili, 09 Outubru 2026 – Institutu Nasionál Kombate HIV-SIDA (INCSIDA) realiza atividade sensibilizasaun ba estudante sira husi Centro Formasaun Tane Futuru (CFTF), ho objetivu atu hasa’e koñesimentu kona-ba HIV-SIDA, dalan transmisaun no medida prevensaun, hodi ajuda estudante sira proteje an no prevene transmisaun vírus HIV.
Prezidente INCSIDA, Daniel Marçal, hatete katak objetivu prinsipál husi atividade sensibilizasaun ne’e mak atu hametin koñesimentu no konsiénsia públika kona-ba HIV, liuhusi komunikasaun no partilla informasaun entre ema ho ema, hodi hamenus risku transmisaun vírus HIV iha komunidade.
“hau hanoin objetivu ne’e imi hotu hatene, ita hotu hamutuk atu hapara risku transmisaun HIV ne’e, hapara ho ita koalia ba malu, koalia bebeik fo hanoin bebeik ne’e ita hotu nia objetivu” dehan Presidente Institutu Nasional Combate HIV-SIDA (INCSIDA), Daniel Marçal iha resintu INCSIDA Pantai kelapa
Atividade sensibilizasaun ne’e envolve estudante kuaze 300, ne’ebé maioria mak joven husi Centro Formasaun Tane Futuru (CFTF). Partisipante sira mai husi área formasaun Lian Korea, Saúde no Lian Inglés.
Daniel Marçal esplika katak joven sira mak parte importante ba dezenvolvimentu nasaun nian iha futuru. Tanba ne’e, sira presiza iha koñesimentu ne’ebé adekuadu kona-ba HIV-SIDA, liuliu kona-ba dalan transmisaun no medida prevensaun.
Nia mós hato’o preokupasaun kona-ba risku ne’ebé bele mosu bainhira joven sira la iha koñesimentu adekuadu kona-ba HIV, inklui bainhira sira evita halo teste no la asesu ba tratamentu saúde.
“maibe ita joven sira nene la iha koñesimentu ba problema transmisaun no prevensaun HIV-SIDA imi bele hanoin tok sira ne’e risku halo nusa sira nia inan aman investe makas iha sira, sira esforsu makas depois sira la iha koñesimentu risku ba transmisaun HIV makas sira bele kona HIV. At liu mak sira kona HIV lakohi ba tes ran, la halo tratamentu sirs sei husik vida, sira husik vida iha mundu inan aman sira terus saugati” hatete Daniel Marçal
Nia haktuir katak INCSIDA sei kontinua hala’o atividade sensibilizasaun ba komunidade, liuliu ba joven sira, atu hasa’e koñesimentu kona-ba prevensaun HIV, enkoraja teste HIV no promove asesu ba servisu saúde.
Iha parte seluk, Diretór Ezekutivu Centro Formasaun Tane Futuru (CFTF), Maurisio Guterres, hatete katak sentru formasaun ne’e halibur joven kuaze 300, ne’ebé presiza hetan informasaun no edukasaun kona-ba prevensaun HIV-SIDA.
Nia esplika katak atividade sensibilizasaun ne’e importante atu estudante sira komprende didi’ak risku transmisaun HIV no hatene oinsá atu proteje an husi infesaun.
“Centro formasaun ne’e ita akumula duni sira oinsa para hafanu sira nia an sira nia honoin para atu prevene sira an liu husi transmisaun ida ne’e tanba ida ne’e perigu tanba ita hatene katak hau hare territoriu Timor Evita duni tanba risku ne’ebé sae makas, ne’ebé importante ba sira para ita nia joven sira ne’e tenke prevene kedan duke ita kura” dehan Diretor Ezekutivu CFTF, Maurisio Guterres
Nia mós apela ba estudante sira atu uza koñesimentu ne’ebé hetan husi atividade sensibilizasaun ne’e iha sira nia moris loroloron, hodi ajuda prevene transmisaun HIV no promove hahalok saudável iha komunidade.
Atividade sensibilizasaun ne’e parte husi esforsu INCSIDA atu kontinua fó edukasaun kona-ba HIV-SIDA ba komunidade, liuliu ba joven sira, hodi hametin prevensaun, enkoraja teste HIV no promove asesu ba tratamentu saúde.
Jornalista: Aniceto da Silva
