Dili, 09 Outubru 2026 –Governu Timor-Leste, liuhusi Sekretaria Estadu Formasaun Profisionál no Empregu (SEFOPE), kontinua halo kordenasaun ho Embaixada no adidu Timor-Leste iha Austrália kona-ba kazu traballadór Timor-oan sira ne’ebé hela-fatin tama ilegalmente, ho sasan balun estraga no lakon. SEFOPE sei kontinua halo komunikasaun ho autoridade kompetente no parte relevante sira atu asegura katak kazu ne’e hetan investigasaun no buka solusaun ba dokumentu traballadór sira nian ne’ebé karik lakon ka estraga.
Diretór Jerál SEFOPE, Carlito do Rosario Cabral, hatete katak to’o agora, instituisaun ne’e seidauk simu relatóriu eskrita kona-ba akontesimentu ne’e. Nia esplika katak kazu hanesan ne’e presiza tuir prosesu investigasaun no prosedimentu legál ne’ebé aplika iha Austrália.
“Kona-ba ita-nia maluk sira ne’ebé servisu iha Austrália, ne’ebé ita haree iha mídia sosiál katak ema tama ba sira-nia hela-fatin, estraga no na’ok sasan balu, to’o agora ami seidauk iha relatóriu eskrita ida. Buat hanesan ne’e iha nia prosesu rasik. Ita bele halo kordenasaun ho adidu no embaixadór, maibé prosesu ne’e tenke lao tuir regra no ierarkia iha nasaun ne’ebá,” dehan Carlito do Rosario Cabral ba jornalista sira iha Aeroportu Internasional Nicolau Lobatu Comoro Dili
Nia hatete katak, prosesu identifikasaun no investigasaun kona-ba akontesimentu ne’e sei hala’o husi autoridade kompetente iha Austrália. Hafoin investigasaun remata, informasaun kona-ba rezultadu sei transmite ba parte Timor-Leste liuhusi adidu ka Embaixada Timor-Leste iha Austrália, konsidera katak vítima sira mak sidadaun Timor-oan.
Iha parte seluk, Governu sei kontinua halo kordenasaun ho adidu, Embaixada, ajénsia no kompañia relevante sira atu buka solusaun ba dokumentu traballadór sira-nian ne’ebé karik lakon ka estraga durante akontesimentu ne’e.
“Kona-ba sira-nia dokumentu, ami sei kontinua halo kordenasaun ho adidu, embaixadór, ajénsia no kompañia atu buka dalan oinsá bele rezolve problema dokumentu sira-nian ne’ebé karik lakon. Bainhira investigasaun remata, ami sei kontinua halo kordenasaun kona-ba prosesu dokumentu sira-nian, atu sira bele kontinua servisu iha ne’ebá tuir durasaun kontratu ne’ebé sira iha,” informa Diretór Jerál SEFOPE.
Antes ne’e, iha semana kotuk, SEFOPE kontaktu ona adidu Timor-Leste iha Austrália. Iha momentu ne’ebá, adidu iha fatin akontesimentu atu halo kordenasaun ho autoridade no parte relevante sira, hodi buka medida prevensaun atu evita akontesimentu hanesan ne’e akontese fila-fali.
“Iha semana kotuk, ami telefone ona ba adidu. Iha momentu ne’ebá, adidu iha duni fatin akontesimentu atu halo kordenasaun ho parte sira ne’ebá, atu bele prevene hahalok hanesan ne’e hodi labele akontese tan ba ita-nia traballadór sira,” remata Diretór Jerál SEFOPE
Jornalista: Aniceto da Silva
