Dili, 06 Outobro 2026– Autoridade Munisípiu Dili, hamutuk ho Governu no autoridade seguransa, hamoris fali implementasaun Tara-Bandu iha Suku Komoro, Postu Administrativu Dom Aleixo, atu regula atividade komunidade, inklui jogu sira, no prevene estraga rekursu naturál no ambiente.
Sekretáriu Estadu Floresta (SEF), Fernandino Vieira da Costa hatete katak, objetivu Tara-Bandu ne’e atu hamoris fila fali lei tradisional hodi konserva kultura ne’ebé Bei-ala sira husik hela ba ita,
“Objetivu prinsipál husi tara-bandu ida-ne’e oinsá atu hamoris fila-fali lei tradisionál ne’ebé iha, ita hatene katak tara-bandu ida-ne’e oinsá atu konserva fila fali kultura husi Bei-ala sira, ita hatene katak populasaun kuandu aumenta iha fatin ida fo presaun ba rekursu naturais no mos presaun ba rai sai hanesan kauza boot ida iha rai laran” Dehan Sekretáriu Estadu Floresta (SEF), Fernandino Vieira da Costa ba jornalista sira iha Suku Komoro
Komandante PNTL Munisipiu Dili, Asistente Komisariu Polisia, Orlando Gomes reforsa katak, husu ba hotu-hotu atu kumpri regras ne’ebé Bandu ona, tanba Tara-Bandu hanesan atu kesi relasaun ema ho natureza no mos ema ho ema.
“Tara-Bandu ita hotu akompaña iha Timor laran tomak, Tara katak, haketak , Bandu katak, Proibisaun tenke respeita no kumpri regras sira ne’ebé iha, Tara-Bandu hanesan relasaun hodi kesi entre ema ho ema relasaun entre ema ho natureza, relasaun ema ho komunidade, ita hotu-hotu halibur malu iha fatin ida ne’e atu reafirma Tara-Bandu ho kumpri ba regras ne’ebé Bandu ona” hatete Komandante PNTL Dili
Xefe Suku Comoro, Eligio José Marçal afirma katak, Tara- Bandu ne’e hetan konsultsaun entre komunidade, Autoridade Lokal no mos lia nain Suku Komoro nian hodi proteje rekursu naturais no Floresta.
“Tara-Bandu ida ne’e liu husi konsultasaun entre komunidade sira ho autoridade lokal hanesan Lia nain ne’ebe iha suku laran, Suku komoro iha ona baze legal no suku Komoro rasik iha lei ne’ebé hakerek ona iha livru Tara-bandu nian, liu husi lansamentu regulamentu Mapa uza rai ba futuru liu-liu serimonia kultura Tara-Bandu, hodi proteje no haburas rekursu naturais liu-liu floresta iha suku Comoro” dehan Xefe Suku Komoro.
Tara-Bandu ne’e bazeia ba dekretu Lei 14/2017 iha 02 agosto rejime Floresta no regulamentu UNTAET dekretu Lei 2000/17.
Jornalista: Mateus F. de Deus
