Dili, 08 Outubru 2026 — Sekretaria Estadu Formasaun Profisionál no Empregu (SEFOPE), hamutuk ho família, simu ona isin mate traballadór Joel Assa, ne’ebé hetan dezastre mout iha área Emerald Beach, Coffs Harbour, New South Wales, Austrália, no lakon vida iha loron 6 Abril 2026. Isin lolon Joel Assa ne’ebé entrega ba família la kompletu, maibé família simu ho liman rua no mataben
Diretór Jerál SEFOPE, Carlito do Rosario Cabral hatete katak, Sekretariu Estadu Formasaun Profisional no Empregu (SEFOPE) nia servisu hodi esforsu ba traballador sira ne’ebé hetan dezastre iha Australia hodi buka dalan no trata nia mate isin ne’e hodi lori mai Timor-Leste nune’e família simu no funebre tuir kultura ne’ebé iha.
“Hanesan bai-bain SEFOPE kuandu rona dehan ninia ema ida ou traballadór ida hetan dezastre lakon vida iha estranjeiru laos iha Australia mesak iha Korea iha ne’ebé deit sira servisu ba liu husi SEFOPE ita sempre halo esforsu hotu hodi trata ninia isin tenke fila fali mai ninia rain nune’e bele halot tuir kultura ida-idak ninian” Dehan Diretór Jerál SEFOPE, Carlito do Rosario Cabral ba jornalista sira iha Aeroportu Internasional Nicolau Lobatu, Comoro, Dili
Traballadór Joel Assa ne’e husi Munisipiu Viqueque Postu Administrativu Uatucarbau Suku Afaloicai ne’ebé hetan oportunidade husi SEFOPE hodi hala’o servisu iha Australia loron 03/10/ 2024 ate 07/06/2025 tuir kontratu ne’ebé husi Kompaña Agency Connect Group (Rose Farm) durante fulan 9.
Maibé matebian Joel Assa foti desizau hodi sai husi Sistema ne’ebé kompaña Agency Connect Group (Rose Farm) iha loron 22 fulan Janeiru 2025.
Nia dehan katak, Matebian Joel Assa hetan dezastre iha loron 6 fulan Abril 2026. Maibe nu’udar Timor oan sira ne’ebé hetan dezastre no lakon vida iha Australia, Sekretariu Estadu Formasaun Profisional no Empregu (SEFOPE) sempre halo esforsu no liu husi adidu ho embaxadór sira iha nasaun ne’ebé sira hela ba sempre buka tuir traballador sira ne’ebé hetan dezastre iha ema nia rain.
“Joel Asa hetan dezastre iha iha loron 6 Abril 2026, esforsu hotu ita halo, ita kordena ho adidu iha Australia ho parte kompetente liu-liu Polísia Marítima Australia nian sira halo esforsu liu husi tasi no Helikopteru tuir regra ne’ebé sira iha maibé to’o fim la konsegue hetan nia isin, entaun iha momentu ne’eba la hetan tuir périodu ne’ebé fó ba sira buka tuir,” dehan DJ SEFOPE
Tanba ne’e parte governu Australia haruka karta ofisiál ida atu haruka família husi Joel Assa nia Inan no Aman ba halo teste ran iha Australia hodi tau hela karik sira hetan ninia isin balu hodi teste fali.
“SEFOPE fasilita família matebian nian na’in tolu, nia Pai, Mãe no Tia ba Australia hodi hasai ran tau iha ne’eba no iha tempu liu ba sira hetan nia parte ruin balu mak koko ba ran ne’ebé família tau hela iha ne’eba no identifika katak parte ruin ne’ebé hetan ne’e Joel Assa nian no depois identifika sira haruka informasaun liu husi adidu ne’ebé ita koloka iha Australia informa mai SEFOPE no ami informa ba família, ita halo kordenasaun hodi hein isin mate Joel Assa nian,” informa DJ Carlito
Família Matebian, Ananu Assa Maun ba Matebian Joel Assa hatete katak, senti triste tanba lakon alin ida husi familia nian maibe agradese ba Governu Timor-Leste no Governu Australia nia esforsu tomak bele lori fila Joel Assa nia isin mate fila mai maske isin lolon la kompletu.
“Ami nu’udar familia durante loron hira ne’e ami mos sente triste, maibé ami husu nafatin agradese ba Governu Timor-Leste oras ne’e bele esforsu hau nia alin nia ain mai, hau nu’udar matebian nia maun representante mos inan aman hotu ami husu obrigadu barak ba governu Timor-Leste no mos embaixada iha Australia ne’eba sira nia esforsu tomak” dehan Ananu Assa.
Matebian Joel Assa dadaun ne’e halo transladasaun ba nia moris fatin orijen iha Munisípiu Viqueque, Postu Administrativu Uatulari no funebre tuir kultura tradisaun familia nian iha loron 11 fulan Outubru 2026. Matebian Joel Assa husik hela faluk oan kiak na’in rua, kompostu feto ida no mane ida.
Jornalista: Aniceto da Silva
