Dili, 08 Outubru 2026 – Sekretaria Estadu Formasaun Profisionál no Empregu (SEFOPE) informa katak kandidatu timoroan na’in 90.000 ne’ebé hetan ona númeru referénsia no rejistu iha sistema sei tama iha estatutu standby, ne’ebé signifika katak sira hein oportunidade seleksaun husi kompañia ka empregadór iha Austrália.
Diretór Jerál SEFOPE, Carlito do Rosario Cabral, esplika katak kandidatu sira ne’ebé hetan ona númeru referénsia rejista ona iha sistema, maibé sei hein to’o kompañia hili sira atu kontinua ba etapa rekrutamentu tuirmai.
“Ita-nia maluk sira ne’e prontu hela. Sira ne’ebé hetan ona númeru referénsia, signifika katak sira rejista ona iha sistema PALM nian no hein oportunidade. Sira ne’e mak ita bolu standby. Bainhira kompañia hili sira, SEFOPE sei fasilita atu kontaktu sira hodi tuir prosesu entrevista iha lian Inglés, teste saúde, teste fíziku no teste abilidade. Prosesu hirak ne’e kompañia mak hala’o diretamente ba kandidatu sira, SEFOPE fasilita de’it,” dehan Carlito do Rosario Cabral ba jornalista sira iha Aeroportu Nicolau Lobatu Comoro Dili
Nia hatete katak, maski kandidatu sira hetan ona númeru referénsia, funsionáriu sira iha Direksaun Nasionál Empregu Estranjeiru (DNEE) kontinua halo verifikasaun ba perfil kandidatu sira nian ne’ebé rejista iha sistema. Verifikasaun ne’e inklui koñesimentu, kapasidade no abilidade iha lian Inglés, atu identifika área ne’ebé kandidatu sira presiza hadi’a molok tama ba prosesu seleksaun.
“Maski sira hetan ona númeru referénsia, funsionáriu sira iha Diresaun Nasionál Empregu Estranjeiru sei verifika sira-nia perfil iha sistema. Karik sira-nia koñesimentu ka kapasidade lian Inglés seidauk di’ak, SEFOPE bele fasilita formasaun adisionál durante sira hein oportunidade. Formasaun ne’e bele hala’o hamutuk ho parseiru sira durante fulan tolu ka fulan neen, depende ba nesesidade no durasaun programa,” Diretór Jerál SEFOPE ne’e hatete.
Nia aumenta katak, durante kandidatu sira tuir formasaun, kompañia bele kontaktu sira atu tuir entrevista no etapa rekrutamentu seluk. Maibé desizaun finál atu simu ka la simu kandidatu ida depende ba kompañia ka empregadór.
“Durante formasaun, se kompañia kontaktu sira, kandidatu bele kontinua ba entrevista no prosesu seluk ne’ebé kompañia rasik hala’o. Desizaun atu simu ka la simu kandidatu depende ba kompañia ka empregadór. SEFOPE labele obriga kompañia atu hili kandidatu ida, tanba kompañia mak iha kritériu rasik,” nia esplika.
Carlito do Rosario Cabral mós fó ezemplu katak, kompañia ida bele iha kritériu espesífiku kona-ba altura, idade no kondisaun fízika, tuir tipu servisu ne’ebé kandidatu sei hala’o.
“Se kompañia hakarak hili traballadór ho altura 170 sentímetru, idade 24 tinan no kondisaun fízika ne’ebé di’ak, kompañia mak sei hili tuir kritériu ne’ebé sira determina. Tanba área servisu ida-idak iha nesesidade no kritériu ne’ebé la hanesan,” nia hatutan.
SEFOPE sei kontinua fasilita prosesu rekrutamentu no formasaun ba kandidatu sira, tuir oportunidade servisu ne’ebé disponivel no nesesidade husi kompañia ka empregadór iha Austrália.
Jornalista: Aniceto da Silva
