DILI, 29 Outubru 2026 — Ministériu Interiór, liuhusi Diresaun Nasionál Seguransa Rodoviária (DNSR), hamutuk ho Polisia Tranzito hala’o atividade sosializasaun iha Kinta-feira 29 fulan Outubru 2026 hodi apela ba komunidade atu utiliza estrada públika tuir regra tránzitu sira ne’ebé vigora, hodi prevene asidente rodoviáriu.
Diretór Nasionál Seguransa Rodoviária (DNSR), Elder Soares afirma katak, atividade sosializasaun ne’e hala’o durante fulan ida nia laran, ho objetivu atu fó hanoin ba komunidade iha territóriu tomak kona-ba importánsia atu kumpre regra tránzitu bainhira utiliza estrada públika.
“Objetivu husi atividade ne’e nafatin atu fó hanoin ba ita-nia komunidade iha territóriu laran tomak, liuliu tanba besik ona loron boot sira, ne’ebé movimentu ba munisípiu barak aumenta. Tanba ne’e, ami iha dever atu fó hanoin ba komunidade atu utiliza estrada públika tuir regra, nune’e bele evita asidente durante sira-nia viajen,” dehan Elder Soares ba jornalista sira iha Terminal Becora
Nia hatutan katak, DNSR mós apela ba kondutór bus sira ne’ebé transporta pasajeiru atu la lori pasajeiru liuhusi kapasidade ne’ebé determina, hodi evita risku asidente rodoviáriu. Kondutór sira ne’ebé la kumpre regra tránzitu sei hetan sansaun husi Polísia Tránzitu, tuir lei ne’ebé vigora.
“Ami nafatin refere ba bus sira tanba dala barak bus balun lori pasajeiru barak liu, to’o iha pasajeiru balu hamriik besik odamatan. Tanba ne’e, ami iha dever atu fó hatene ba kondutór sira katak pasajeiru ne’ebé lori tenke tuir kapasidade bus nian, hodi evita asidente. Ida ne’e importante tebes, no bainhira sira la kumpre regra, sei hetan sansaun husi Polísia Tránzitu,” nia esplika.
Iha atividade sosializasaun ne’e, DNSR hamutuk ho Polísia Tránzitu hala’o kontrolu iha Elemloi, Terminal Tasi-Tolu no too iha Terminal Becora. Iha kontrolu ne’e, Polísia Tránzitu konsege prende motór tolu ne’ebé viola regra tránzitu, no hala’o asaun tuir dispozisaun legál sira ne’ebé regula iha Kódigu Estrada.
Entretantu, Direksaun Nasionál Seguransa Rodoviária (DNSR) sei kontinua atividade sosializasaun iha munisípiu no postu administrativu sira iha territóriu Timor-Leste tomak, atu aumenta konsiénsia komunidade nian kona-ba seguransa rodoviária no prevene asidente iha estrada públika.
Jornalista: Aniceto da Silva
