Dili 01 Juñu 2026-Asosiasaun Parteira Timor-Leste rekoiñese Parteira sira ne’ebé mak dadaun ne’e servisu iha fasilidade sidade iha Timor laran tomak sei menus tanba ne’e Asosiasaun Parteira Timor-Leste sei ko’alia ho Ministreriu Saúde atu implementa planu estratéjia atu bele aumenta parteira sira iha fasilidade saúde sira hotu.
Presidente Asosiasaun Parteira Timor-Leste atuál Dekana Fakuldade Medisina iha UNTL Lidia Gomes hatete,los duni foin dadauk Ministériu Saúde halo rekrutamentu ba profisionál saúde sira maibé dezafiu ida maka kolokasaun parteria sira iha área rurál sei menus tanba parteira ne’e la’ós UNTL de’it prodús maibé universidade no institutu privadu seluk mós prodús graduadu parteria barak, maibé problema prinsipál mak kolokasaun servisu tuir nesesidade komunidade.
“Ita haree iha área rurál, dala barak parteria ida de’it tenke halo servisu ba ema barak, ne’ebé sai dezafiu bo’ot tanba karga servisu todan tebes, maibé ami kontinua ko’alia ho Ministériu Saúde atu bele implementa estratéjia to’o 2030, ne’ebé preve parteria na’in rua, infermeiru na’in rua, médiku na’in rua no profissional saúde aliados seluk iha kada health post ka área suku sira” dehan Presidente Asosiasaun Parteira Timor-Leste atuál Dekana Fakuldade Medisina iha UNTL Lidia Gomes, ba Jornalista sira iha Salaun Pusat Budaya, Segunda(01/06).
Nia dehan tuir dadus ne’ebé maka aprezenta, atualmente totál parteria ne’ebé servisu iha governu hamutuk besik 900 maibé totál graduadu parteria iha Universidade sira iha Timor-Leste hamutuk rihun rua resin.
“Maibé, balun seidauk hetan servisu no obriga buka atividade seluk hanesan fa’an sasán iha loja no merkadu, situasaun ida ne’e halo triste tanba númeru parteria sufisiente ona, maibé problema prinsipál mak kolokasaun seidauk kompletu no la tuir nesesidade povu nian,” nia dehan.
Tanba ne’e asosiasaun profissional sira hanesan Médiku no Infermeiru sai nafatin parseiru servisu importante ba Ministériu Saúde atu fortalese sistema saúde nasional iha Timor-Leste.
Molok ne’e Diretór Servisu Saúde Munisípiu Ermera Antonio de Fatima informa kona-ba profisional saúde sira ne’ebé mak rekruta iha tinan 2025 dauaun ne’e hamutuk 23 ne’ebé tuir formasaun iha HNGV no iha fulan maiu ne’e koloka ona ba iha Munisípiu Servisu Saúde Ermera.
“Husi 23 ne’e médiku na’in lima, parteira nain ualu, infermeiru na’in neen, nutrisaun na’in rua no saúde públika na’in rua sira ne’e ita koloka hotu ona bazeia ba mapamentu ne’ebé mak iha no mós bazeia ba nesesidade ne’ebé mak munisípiu iha atu nune’e bele kobre ba fasilidade saúde ne’ebé mak iha Ermera,”dehan Diretór Servisu Saúde Munisípiu Ermera Antonio de Fatima ba Jornalista sira via telefone Kinta (28/05).
Nia dehan kolokasaun ne’ebé mak Ministériu Saúde halo ne’e seidauk sufisiente atu bele kobre iha sentru saúde no postu saúde sira ne’ebé mak iha Munisípiu Ermera nian ne’e.nia remata.
Jornalista: Aniceto Da Silva
