Dili, 18 Agostu 2026—Sekretaria Estadu ba Igualdade no Inclusaun (SEI), hamutuk ho Instituto Nacional de Estatística Timor-Leste (INETL) no UN Women, finaliza no lansa ona Perfil Jéneru Munisipál, ne’ebé sei sai nu’udar fonte importante atu fó dadus no informasaun kona-ba situasaun jéneru iha munisípiu sira no apoia dezenvolvimentu polítika no planeamentu sensível ba jéneru.
Dokumentus Ofisiál ne’e iha relevánsia boot ba ajenda dezenvolvimentu desentralizasaun Timor-Leste hodi fornese evidénsia prátika ba munisípiu no instituisaun nasionál sira atu identifika lakuna, determina prioridade investimentu no haforsa planeamentu, dezenvolvimentu polítika, orsamentasaun, prestasaun servisu no monitorizasaun ne’ebé responsivu ba jéneru.
Sekretária Estadu Igualdade (SEI), Elvina Sousa Carvalho hatete, liuhusi dadus ne’e bele halo planu, hodi hasae númeru feto ba asesu edukasaun no servisu ne’ebé iha.
“Ida-ne’e sei guia ami atu ami bele hasa’e númeru feto nia ba asesu edukasaun, servisu saida de’it ne’ebé iha. Liuhosi dadus ne’e ami bele halo intervensaun ba alvu sira,” dehan Sekretária Estadu Igualdade (SEI), Elvina Sousa Carvalho ba jornalista sira, iha Otél Timor.
Iha fatin ne’e Prezidente Institutu Nasionál Estatístika Timor-Leste (INETL), Elias dos Santos Ferreira informa ohin lansa tanba INETL servisu hamutuk SEI no hetan apoiu tékniku hosi UN Women ne’ebé finaliza ona perfil munisípiu sira
“Relatóriu ne’e parte husi sensu uma-kain nian. Ne’ebé ohin ita lansa ne’e perfil kada munisípiu depoiz entrega ba Ministériu Administrasaun Estatál para públika iha portál,” nia dehan.
Nia espera katak parte relevante bele uza dadus atu halo planu sira. Tanba atu diskute tan ona orsamentu 2027 ne’ebé dadus ne’e bele ajuda.
Portantu, Prezidente UN Women iha Timor-Leste, Amy Nishtha Satyam hatete, ohin iha ne’e tanba sai kestaun urjente liu iha minutu ida nia laran no bele la hanesan. Diferensa sira seluk iha edukasaun, empregu, nutrisaun, responsabilidade kuidadu defisiénsia nian. Asesu ba servisu sira presiza duni planeamentu no investimentu bazeia ba kontestu ida.
“Tanba ne’e, saida maka ami hein atu aprezenta ohin ho orientasaun ida hosi ministériu sira. Estatístika la’ós istória médiu ida. Ha’u hein katak saida de’it maka ita lansa ohin sei sai importante, la’ós de’it ba parte jéneru nian, no ha’u halo de’it maka estatístika, maibé mós ba ministériu administrasaun Estatál nian,” nia dehan.
Biban ne’e nia enkoraja asaun tolu hosi ministériu sira, partikularmente reprezentante ministériu sira ne’ebé iha. Tanba ne’e espera ministériu relevante sira bele uza dadus ne’e
“Ha’u hanoin, hanesan ami maka parseiru dezenvolvimentu nian, ami tenke hadomi atu uza dadus ne’ebé ami produz, katak ida-ne’e la’ós de’it relatóriu ida, maibé ida-ne’e hanesan asesoria ida atu hateten mai ami saida maka atu halo planu daruak no investe tuir kontestu Feto sira-nia moris moris diferente tebes ho sira ne’ebé asu vegan. Mai ita kontinua hametin evidénsia sira. Ha’u hatene katak perfíl sira foinsa’e nian mós dezenvolve hela, no nune’e ami la halo. Ami lakohi atu ezersísiu ida-ne’e para de’it iha perfíl jéneru nian,” nia konklui
Jornalista: Aniceto da Silva
