Díli, 14 Abril 2026 – Instituto Nasional Kombate HIV-SIDA (INCSIDA) fahe informasaun ba kona-ba Virus HIV-SIDA ba Estudante Universidade da Paz (UNPAZ) Fakuldade Saúde Públika, ema barak mate kona-ba moras HIV-SIDA tanba virus ne’e kona ona maibe lakohi ba tes ran no tes ran hodi bele hatene no kurativu
Presidente Instituto Nasional kombate HIV-SIDA (INCSIDA), Daniel Marçal hatete, objetivu prinsipal husi sensibilizasaun ne’e mak oinsa estudante sira no ema hotu atu bele hakbesik ba centru saude hodi halo teste ba Ran nune’e HIV labele hela kleur iha ita nia isin hodi transforma fali ba SIDA
“Sensibilizasaun ne’e objetivu importante mak agora ita hakarak buka esforsu hodi konvensaun ema atu ba koko raan lalais, atu nune’e labele fo tempu ba HIV ne’e atu hela kleur iha ita nia isin, tamba bainhira HIV ne’e hela kleur iha ita nia isin ne’e posibilidade boot bele fila aan ba AIDS, ne’e hein mate ona” dehan Presidente Instituto Nasional Kombate HIV-SIDA (INCSIDA), Daniel Marçal iha Salaun Casimero UNPAZ
Nia hatutan, iha Timor Leste moras HIV-SIDA halo ema barak mate tanba la ba halo teste Ran iha Sentru Saúde sira
“Ema barak iha Timor ne’e mate ona tamba lakohi interese atu ba koko raan, iha klinika ka postu saude, AIDS ba HIV ne’e laos buat fasil ida, bele-bele lakon vida, apelu ba ema hotu-hotu lalika tauk no lalika moe, diak liu ba koko raan tamba ita ema posibilidade boot tebes ba transmisaun HIV ne’e tamba ne’e diak liu detekta antes tiha para labele kona AIDS ka SIDA” Afirma Presidente Insida
Vise Reitor Asunto Estudantil UNPAZ, Felisberta Amaral Orleans de Oliveira hateten, sensibilizasaun ne’ebé halo husi Instituto Nasional Kombate HIV-SIDA ba iha estudante UNPAZ Fakuldade Saúde Públika ne’e importante tebes ba joven sira atu prevene a’an husi Virus HIV-SIDA
“Ita hatene joven sira mak autor ba buat hotu tamba ne’e mak husu ba joven sira atu proteze sira nia an moras ne’ebé buras iha Timor Leste ita hatene katak moras HIV-SIDA ita akompaña iha Timor Leste nia numeru sae ona 2000 resin ne’e laos buat kiik maibe ne’e buat boot tamba ne’e mak parte husi INCSIDA halo sensibilizasaun ne’e diak tebes atu nune’e joven sira prevene husi virus ne’e tamba futuru nasaun nia iha joven sira nia liman” dehan Vise Reitor Asunto Estudantil UNPAZ
Representante Estudante Universidade da Paz, Fakuldade Saúde Públika, Novela Cardozu agradese ba Instituto Nasional kombate HIV-SIDA (INCSIDA) ne’ebé fahe ona informasaun kona-ba Virus HIV-SIDA
“Nu’udar estudante ami agradese ba Instituto Nasional Kombate HIV-SIDA fahe ona informsaun ba ami, iha estudante barak mak menus koñesimentu ba moras HIV-SIDA, seidauk hatene lolos kona-ba lalaok moras HIV-SIDA, tanba ne’e ami agradese tebes ba INSIDA” nia hakotu
Jornalista : Mateus F. de Deus
