Dili, 29 April 2026-OXFAM Timor-Leste hala’o atividade konaba programa Hakbiit Asaun koletivu ba equaldade no inkluzaun iha Timor-Leste liu husi aktividade Romansa (Rai Osan ba Mudansa), emprestimu no inkluzivu finanseira
Diretor Ezekutivu OXFAM Timor-Leste, Pankaj Anad hateten, programa Hakbiit ne’e iha fase ikus, no objetivu mak atu empodera feto sira hodi hadia ekonomia familia nian laran
“Programa HAKBIIT ida ne’e iha fase ikus mak ne’e, programa HAKBIIT implenenta iha 2020 to 2026 iha ne’e ita iha parseiru sira husi Oecusse, Atauru, Likisa nomos Suai, programa HAKBI’IT ne’e nia objetivu mak empodera feto maluk sira hadi’a ekonomia familia nian nomos iha sosiedade nia laran, hau hakarak rekonese ba parseiru sira hanesan AFFOS, BIFANO, MANEO, KSI, no RHTO” Dehan Diretor Ezekutivu OXFAM Timor-Leste Pankaj Anad iha Timor Plaza Dili
Diretor hatutan, sistema aprendizajen Asaun Jeneru (GALS), ne’e implementa iha sosiedade ho objetivu atu feto ho Mane bele hatene nia knaar no bele komprende malu hodi kria planu ba futuru.
“Sistema aprendizajem Asaun Jeneru (GALS), ne’e implementa iha familia ida nia laran ho objetivu atu feto ho Mane hatene nia knaar no bele komprende malu nomos kria planu familia nian no la’o ba oin liu tan, no Rai Osan ba Mudansa ida ne’e grupu husi komunidade sira Rai Osan semana ida dala ida maibe sira mos buka Osan atu Rai no bele hadi’a sira nia uma laran” hateten Diretor OXFAM TL.
Reprezentante grupu Binibu Faef Nome (BIFANO), Felizberto de Deus hateten, iha tinan 2003 to 2006 fan karau iha Oecusse hodi ba Dili no osan sira ne’e lori ba fali Oecusse maibe osan la gasta no la uja derepenti hotu
Nia akresenta, iha tinan 2020 ho nia kaben deside hodi tama grupu ne’ebé komesa rai osan hodi selu oan sira nia eskola no balun uja ba halo uma ho nesesidade lor-loron nian
“Iha 2003 to’o 2006 ha’u faan karau husi Oecusse mai Dili, maibe bainhira hau faan karau no osan ne’ebé ema hola hau lori fali ba Oecusse maibe osan ne’e gastu ba saida deit ami la hatene derepente deit osan ne’e hotu ona. Depois hau para tiha faan karau hau kontinua fali sai karpinteiru maibe hanesan nafatin maibe iha 2020 hau ho hau nia kaben komesa tama ona ba grupu ne’e no husi ne’e ami aprende rai osan no husi osan ne’ebé ami rai ami uza hodi selu oan sira nia eskola no ami planu atu halo uma” dehan Felizberto de Deus
Iha aktividade ne’e partisipante husi grupu ROMANSA lima (5) mak hanesan BIFANO, AFFOS, MANEO, KSI, RHTO no estudante husi Universidade UNITAL, IOB no UCT.
Jornalista: Aniceto da Silva
