Dili 01 Juñu 2026-Xefe Estadu-Maior Konjuntu Forsa Armada Brasil nian, Almirante Esquadra Renato Rodrigues de Aguiar Freire, tuir kompeténsia ne’ebé nia iha, hodi deside atu kondekora Kontra-Almirante Donaciano Gomes, Ministru Defeza Timor-Leste (MD), ho Medalla Méritu Estadu-Maior Konjuntu Forsa Armada sira nian.
Serimónia kondekorasaun ne’e akontese hafoin Embaixadór Brazil ba Timor-Leste Recardo Real hasoru nia omologu Ministru Defeza Kontra Almirante Donaciano do Rosário da Costa Gomes Pedro Klamar Fuik iha Ministeriu Defeza Fatuhada segunda ne’e
Serimónia ida-ne’e nia objetivu atu hala’o solenidade entrega Medalla Méritu Estadu-Maior Konjuntu Forsa Armada Brasil nian ba Kontra-Almirante Donaciano Gomes, Ministru Defeza Timor-Leste.
Medalla Méritu Estadu-Maior Konjuntu Forsa Armada sira ne’e estabelese liuhosi Dekretu Núm. 8.554, loron 6 fulan Novembru tinan 2015, no regula liuhosi Portaria Ministériu Defeza Brasil Núm. 5.424, loron 27 fulan Outubru tinan 2022.
Medalla ida-ne’e destina atu fó agrasiamentu ba militar no sivíl sira, Brasil no estranjeiru, organizasaun militar sira no instituisaun sivíl nasionál sira ne’ebé fó ona servisu relevante ba Estadu-Maior Konjuntu Forsa Armada Brasil nian.
“Ami konvida Sua Excelénsia Ministru Defeza Timor-Leste atu foti fatin ne’ebé prepara ona ba realizasaun entrega komenda ne’e. Ami mos konvida Sua Excelénsia Embaixadór Brasil ba Repúblika Demokrátika Timor-Leste, Ricardo José Lustosa Leal, no Sua Excelénsia Jeneral Exérsitu Alceu Alves Almeida Costa atu hala’o entrega medalla ne’e” dehan Adidu Defeza Brazil ba Timor Koronel Vitor Hugo Bergamachi iha salaun bilaterál Ministeriu Defeza Segunda ne’e
Hafoin Serimónia kondekorasaun Ministru Defeza Kontra Almirante Donaciano do Rosário da Costa Gomes Pedro Klamar Fuik, hateten, ba dahuluk hato’o ha’u nia respeitu ba Xefe Estadu Maiór Konjunta Forsa Armada Brazil ba ita-nia alta kondekorasaun ne’ebé ohin atribui ona
“Simu ida ne’e ho umildade, konsientente ho signifika ba omenajen ida ne’e nudar konfiansa ida ne’ebé nia manifesta. Medalla ida ne’e nudar rekoñesimentu pesoál ba ha’u ne’ebé reprezenta valór dever, disipliña no komprimisiu institusionál no dessiksaun servisu sira ba kauza maior entre ita. No medalla ida nudar simbolu ba lasu amizade, respeitu kooperasaun ne’ebé entre povu rai rua nian no ba ita-nia Institusaun”, nia afirma.
Pedro Klamar Fuik hateten, atribuisaun ba medalla ida ne’e hanessn mós relasaun entre nasaun rua ne’e iha ona ne’ebé lao iha tempu naruk nia laran la’o hamutuk ho responsabilidade, oferese orientasaun no kontribuisaun ba misaun ida ne’ebé komprimenta ba objetivu komum.
“Ho ida ne’e ha’u manifesta ha’u- nia gratidaun. Ha’u simu ondra ida ne’e ho fuan no rekoñesimentu ida ne’e nudar responsabilidade dobru. Mellada ida ne’e ba ha’u la’ós nu’udar pontu ida ne’ebé too iha ne’e, maibé ida nu’udar permanente ida ne’ebé istomula hodi kontinua servi ho legalidade ho sentidu dever hametin liu tan pas iha kooperasaun entre rai rua Timor-Leste no Brazil”, nia afirma.
Ministru Defeza Kontra Almirante Donaciano do Rosário da Costa Gomes Pedro Klamar Fuik fó nia agradesimentu ba Brazil ba atribuisaun medalla ne’ebé fó.
“Ida ne’e sei demostra liu relasaun institusionál rai rua nian. Ba ha’u ida ne’e orgulllu boot tanba Governu Brazil bele rekoñese institusaun ida no ida nu’udar mutuál respeitu ida ne’ebé haree liu ba valór servisu hodi kumpre ba ondra sira. Obrigadu ba Señor Jenerál no ba hotu hotu ne’ebé iha ne’e”, nia subliña.
Jornalista: Aniceto da Silva
