Díli, 23 Juñu 2026– Prezidente Repúblika José Ramos-Horta hatete, estadu Timor-Leste lakon nia lideransa boot ne’ebé nu’udar Eis-Prezidente Repúblika Francisco Guterres “Lú Olo” lakon boot ida ba Timor-Leste, tanba nia nu’udar veteranu, líder polítiku no erói nasional ida ne’ebé dedika nia moris ba luta libertasaun no dezenvolvimentu Estadu Timor-Leste.
Deklarasaun ne’e hato’o hafoin Prezidente Repúblika presta omenajen ba saudozu Francisco Guterres Lú-Olo iha nia rezidénsia Farol Díli, iha ne’ebé família, lideransa polítika no povu barak marka prezensa atu fó respeitu ikus ba eis-Xefe Estadu ne’e.
“Ita lakon kombatente ida, veteranu ida hosi luta tinan 24, polítiku ida no erói ida ne’ebé servisu ba Estadu. Nia kaer papel importante iha luta armada, iha lideransa polítika no iha lideransa máximu FRETILIN nian iha rai laran,” dehan Presidente Repúblika José Ramos-Horta iha Residensia Saudozu Francisco Guterres Lú-Olo
Saudozu Francisco Guterres Lú-Olo nia dalan servisu ba nasaun kompletu liuhosi kargu importante sira ne’ebé nia kaer durante nia moris, nia eleitu nu’udar Prezidente Asembleia Konstituinte, depois sai Prezidente Parlamentu Nasionál no ikus mai sai Prezidente Repúblika.
Ramos-Horta dehan, Lú-Olo la’ós deit lakon ida ba FRETILIN, maibé lakon boot ida ba lideransa nasionál no ba Estadu Timor-Leste tomak.
“Lakon ne’e la’ós deit ba lideransa FRETILIN. Ida ne’e lakon boot ida ba nasaun no Estadu Timor-Leste,” dehan nia.
Alende ne’e Xefe Estadu akredita katak legadu no eransa polítika ne’ebé Francisco Guterres “Lú-Olo” husik hela sei kontinua inspira povu timoroan, liuliu jerasaun foun sira, atu kontinua servisu ba dame, liberdade no demokrasia.
“Ninia legadu sei fó inspirasaun ba povu tomak, ba joven sira no ba lideransa polítika sira atu kontinua buat ne’ebé líderes istóriku sira hanesan Nicolau Lobato no seluk tan hahú ona,” hateten Ramos-Horta.
Prezidente Repúblika haktuir, Estadu tenke tau importánsia hodi tau matan ba família ne’ebé husik hela hosi saudozu Francisco Guterres Lú-Olo, liuliu nia espoza no oan sira.
Nia hatete, Governu no instituisaun Estadu sira sei haree mekanizmu legal sira ne’ebé eziste ona ka kria medida foun hodi garante apoiu dignu ba família hosi líder nasional ida ne’ebé fó nia kontribuisaun boot ba rai no povu.
Enkuantu iha oportunidade ida ne’e Ramos-Horta lembra mos nia vizita ba Malázia iha semana hirak liubá bainhira nia ba vizita maktoban Saudozu Francisco Guterres Lú-Olo iha ospitál, bainhira to’o iha ospitál, nia ko’alia ho eis-Primeira-Dama Cidália Lopes Nobre Mouzinho Guterres, tanba Lú-Olo iha hela Unidade Kuidadu Intensivu (ICU) no hetan tratamentu ba pneumonia.
“Nia iha ICU ona ho pneumonia. Ha’u dehan deit katak ha’u ba vizita nia, maibé ha’u la ko’alia kona-ba nia estadu klínika tanba ne’e la’ós ha’u nia kompeténsia. Médiku mak iha responsabilidade atu hatete,” katak nia.
Ramos-Horta reafirma, durante tempu tomak nia iha respeitu boot ba Lú-Olo tanba nia papel iha luta libertasaun, servisu ba Estadu no dedikasaun ba povu timoroan.
“Prezidente Lú-Olo, ita lakon boot ida ba nasaun,” hakotu Prezidente Repúblika.
Jornalista: Aniceto da Silva
