Díli, 08 Julli 2026– Polísia Sientífika Investigasaun Kriminál (sigla-portugés PCIC), hamutuk ho órgaun seguransa no instituisaun intelijénsia sira, konsege kaptura sidadaun estranjeiru hamutuk 110, maioria husi Xina no Kambódia, tanba suspeita envolve iha atividade burla informatika no jogu online ilegál, iha operasaun ida ne’e iha Aldeia 20 de Setembru, Suku Bebonuk, Postu Dom Aleixo, Munisípiu Díli.
Operasaun ne’e hala’o iha oras tuku 20:30 kalan depois de investigasaun durante fulan ida. Iha operasaun, polísia aprende komputadór 88 unidades, laptop 13 unidades, telemóvel 23 unidades, Starlink 2 unidades, osan montante no ekipamentu eletróniku seluk ne’ebé suspeita uza ba atividade kriminál.
Xefe Investigadór, Otávio da Costa Araújo hatete, investigasaun ne’e hala’o durante fulan ida antes de autoridade sira halo asaun.
“Durante fulan ida nia laran ita halo identifikasaun ba sidadaun Xineza sira ne’ebé suspeita halo atividade jogu ilusitu ho burla informatika. Husi informasaun ne’e, ohin ita konsege infiltra tama iha fatin refere no kaer sira iha flagrante delitu,” dehan Xefe Investigador, Otávio da Costa Araújo ba jornalista sira iha fatin refere.
Nia hatete, bainhira ekipa operasaun tama ba hodi buska iha fatin refere, sidadaun Xineza nain 11 tenta hodi halai, maibé Polisia Nasional Timor-Leste (PNTL) Eskuarda Kristu Rei konsege kaer fila fali
“Iha momentu operasaun, sidadaun Xineza nain 11 halai, maibé ekipa Eskuadra Kristu Rei konsege kaer fila fali. Agora total sidadaun estranjeiru ne’ebé ita asegura hamutuk ema 110,” nia hatete
Xefe Investigadór ne’e informa, suspeitu sira hala’o atividade iha fatin ne’e uza CCTV hodi seguransa nune’e monitoriza movimentu ema no kontrola asesu ba edifísiu.
“sira nia atividade segredu loos. Ema la bele tama karik laiha ID Card espesífiku. Sira mós uza CCTV atu monitoriza ema tama no sai. Tanba ne’e mak ita uza tatika operasionál atu bele infiltra tama,” afirma nia.
Nia dehan, Kona-ba situasaun iha imigrasaun, sidadaun estranjeiru maioria sira la kaer sira nia pasaporte rasik
“Maioria sira nia pasaporte iha ema seluk nia liman. Ema ne’ebé kaer pasaporte sira identifika ona, no iha tempu besik investigasaun sei buka atu kaer,” dehan nia.
Tuir nia, suspeita rede ne’e hala’o burla informatika ba vítima sira iha nasaun oioin, la’ós deit ba sidadaun Timor-Leste.
Agora dadaun, ekipa investigasaun sei kontinua halo identifikasaun ba suspeitu sira, inventaria total osan ho ekipamentu ne’ebé prende, no aprofunda investigasaun atu identifika ema seluk ne’ebé envolve iha rede kriminál ne’e.
“Agora kalan boot ona, ita asegura tiha ema no sasán hotu iha fatin seguru. Aban mak ita halo identifikasaun kompletu no relata montante osan no ekipamentu ne’ebé aprende,” nia hakotu
Jornalista: Mateus F. de Deus
