Manu-Fahi, 14 Jullu 2026-Xefe Suku Babulo husu Instituto Nasional kombate HIV-SIDA, kontinua halo sensibilizasun kona-ba transmisaun Virus HIV-SIDA ba komunidade sira iha kada tinan-tinan nune’e hasae koñesimentu komunidade sira no hatene hodi evita ransu livre.
Presidente Instituto Nasional kombate HIV-SIDA (INCSIDA), Daniel Marçal hateten, Virus HIV-SIDA moras ida ne’ebé risku tebes tanba laiha Aimoruk hodi Kura, Timor Laran tomak rejista ona kazu HIV-SIDA 2600 Inklui Manu-Fahi iha ona 45
“HIV ne’e Pregozu liu moras sira seluk, moras seluk ne’e aimoruk iha, maibe HIV ne’e to agora aimoruk laiha, da’et ba ema fasil maibe atu Kura moras ne’e laiha, alin Joven sira tenke kuidadu, agora ita nian iha Timor 2600 Inklui Manu-Fahi iha 45,” dehan Presidente INCSIDA, Daniel Marçal iha Suku Babulo postu same vila
Presidente INCSIDA, ne’e husu ba komunidade Suku Babulo atu ba tes ran iha sentru Saúde sira hodi hatene tuir moras ne’ebé iha, no labele halo relasaun seksuál livre no labele uza daun tato hamutuk, atu bele Prevene Transmisaun HIV-SIDA tanba ne’e Joven sira tenke kuidadu husi Virus HIV-SIDA
Iha fatin Hanesan Xefe Suku Babulo, Alice de Jesus Nunes agradese ba Presidente Instituto Nasional kombate HIV-SIDA Daniel Marçal ho nia ekipa tanba bele responde ona Pedidu ne’ebé husu ba INCSIDA atu halo Sosializasaun ba Virus HIV-SIDA iha Suku Babulo
“hakarak agradese ba Presidente ho nia ekipa tomak, bazeia ba ha’u nia Pedidu ha’u hato’o ba iha fulan hirak ba kotuk, ha’u hatete katak moras HIV-SIDA ne’e moras perigozu, entaun ha’u husu tenke Sosializasaun ba iha Suku no ita hetan oportunidade, tuir informasaun ne’ebé ha’u iha katak Babulo mo’s iha tiha ona moras, tanba ne’e ita tenke atensaun liuliu ba ba foinsa’e, iha ne’e ha’u hakarak rekomenda se bele sensibilizasaun ne’e tinan tina-tinan tenke hala’o tun ba Suku sira, tanba ita lakohi Timor-Leste nakonu ho HIV-SIDA” dehan Xefe Suku Babulo
Iha atividade sensibilizasaun ne’e hetan partisipasaun maximu husi Komunidade Suku Babulo kompostu husi Ferik katuas Joven Feto no mane, inklui Autoridade Lokal no Seguransa Suku Babulo nian
Jornalista: Mateus F. de Deus
