Dili, 17 Agostu 2026 — Sidadaun Silvano Gomes mate iha Hospital Nasional Guido Valadares (HNGV), depois de hetan tiru husi oknum PNTL balun iha Suku Irabin de Baixo, Postu Administrativu Uatucarbau, Munisípiu Viqueque.
Familia matebian, liu husi Elizario Pereira, husu parte kompetente atu halo investigasaun no prosesa oknum PNTL ne’ebé suspeitu envolvidu iha kazu ne’e tuir lei, hodi Tribunal bele determina faktu no responsabilidade husi parte sira.
“Familia nia hakarak prosesu ne’e tenke tuir lei. Karik matebian mak sala, mos la buat ida; Tribunal mak deside. Ami nia ezije mak lei tenke lao tuir nia koridor,” dehan Elizario Pereira bainhira ko’alia iha HNGV.
Familia mos subliña katak, kazu ne’e tenke separa entre asaun individuál husi oknum ho responsabilidade instituisaun PNTL. Familia husu atu prosesu legal lao ho transparénsia no tuir prosedimentu ne’ebé aplika.
Iha sorin seluk, familia matebian autoriza atu halo autopsia ba isin Silvano Gomes, ho objetivu atu hetan evidénsia ne’ebé bele suporta prosesu investigasaun no, se presiza, aprezenta ba Tribunal.
“Hau autoriza autopsia tanba evidénsia ba prosesu Tribunal. Evidénsia ida mak autopsia ne’e. Agora mate isin ami lori ona ba fatin seguru, hein mandatu husi Prokurador atu halo autopsia,” nia hatete.
Silvano Gomes husik hela oan na’in rua. Familia hatete katak oan na’in rua ne’e agora sai oan kiak tanba matebian nia mate.
Enkuantu ligadu ho kazu ne’e, jornalista sira tenta konfirma informasaun ho Komandu Jerál PNTL, liu husi porta-voz, maibé seidauk hetan resposta ofisiál tanba, tuir informasaun ne’ebé hetan, Komandu Jerál iha atividade servisu seluk.
Kazu ne’e agora hein prosesu investigasaun no desizaun husi autoridade kompetente atu klarifika faktu sira no determina responsabilidade tuir lei.
Jornalista: Mateus F. De Deus
