Dili, 28 Setembru 2026 — Fundasaun Mahein (FM) observa katak atividade Scam Call Centre kontinua buras iha Timor-Leste, ne’ebé konsidera tanba seidauk iha mekanizmu Komandu Konjunta ne’ebé forte atu koordena instituisaun relevante sira, inklui Imigrasaun, PCIC, DNSIK, Ministériu Públiku no Intelijénsia, hodi kombate krime transnasional ne’e.
Diretor Ezekutivu Fundasaun Mahein (FM), Nelson Belo, afirma katak Governu presiza kria no hametin Komandu Konjunta ida ne’ebé bele tau instituisaun estadu sira ne’ebé responsavel ba área seguransa no justisa iha sistema koordenasaun ida, hodi nune’e kombate Scam Call Centre bele hala’o ho efetivu.
Nelson Belo hateten katak iha inísiu fulan Juñu, Governu kria ona Komandu Konjunta atu halo koordenasaun entre instituisaun sira ne’ebé hala’o knaar iha setor seguransa no judisiál. Maibé, tuir nia observasaun, mekanizmu ne’e seidauk lao ho efetivu.
Nia esplika katak, bainhira instituisaun ida-idak hala’o nia knaar rasik, bele mosu problema iha koordenasaun, inklui bainhira hala’o operasaun no buska iha terenu, ne’ebé iha kazu balu bele akontese intervençaun entre instituisaun.
“Ita nia instituisaun ne’ebé toma konta ba asuntu seguransa, liuliu krime transnasional hanesan Scam Call Centre, presiza iha koordenasaun ne’ebé di’ak. Instituisaun sira iha mandatu ida-idak, maibé presiza iha Komandu Konjunta ida atu jere no hala’o servisu hamutuk,” afirma Nelson Belo.
Diretor Ezekutivu Fundasaun Mahein mos subliña katak, maski Timor-Leste iha lei ne’ebé forte, implementasaun lei presiza hala’o ho rigor no koordenasaun entre instituisaun sira.
Tuir nia, fraqueza iha koordenasaun bele aproveita husi grupu sira ne’ebé hala’o atividade Scam Call Centre, tanba sira bele uza lakuna iha sistema atu evita deteksaun no halo evidénsia ba investigasaun sai menus.
Nia hatutan katak kontrolu ba atividade Scam Call Centre tenki konsidera hanesan kombate krime organizadu no transnasional. Tanba ne’e, presiza iha mekanizmu ida ne’ebé klaru atu kontrola movimentu ema estranjeiru, inklui prosesu tama-sai no verifikasaun sira ne’ebé bele iha ligasaun ho atividade ilegal.
Nelson Belo mos konsidera katak, se mekanizmu kontrolu no koordenasaun seidauk forte, bele sai dezafiu ba autoridade sira iha prevensaun no investigasaun ba atividade Scam Call Centre iha territóriu Timor-Leste.
Fundasaun Mahein husu Governu atu hametin koordenasaun entre instituisaun seguransa, justisa no imigrasaun, liuhusi Komandu Konjunta ne’ebé klaru no efetivu, hodi prevene no kombate atividade Scam Call Centre no krime transnasional iha Timor-Leste.
Jornalista: Mateus F. de Deus
