Dili 05 Outobro 2026-Polisia Nasional Timor-Leste (PNTL) liuhusi Komandu Munisipiu Dili fo orientasaun ba Polisia Transito atu kontrola Kareta no Motor sira ne’ebe para iha estrada hodi fo impaktu ba movimentasaun Transporte sira ba mai, tuir orientasaun Komandante Jeral PNTL nian.
Komandante Munisipiu Dili, Asistente Komisariu Polisia, Orlando Gomes, informa no fo orientasaun ba Polisia Transito sira ne’ebé koloka iha terenu atu halo planu hodi prevene asidente no engrafamemtu iha Dili laran.
“enkontru ida ne’e ita fo mos orientasaun ba iha ita nia transito sira, para servisu iha terenu halo plano atu nune’e prevensaun ba asidente sira, halo prevensaun ba iha Engrafamentu ne’ebé mak iha Dili laran tanba motor ho Kareta ne’ebé para estrada para arbiru de’it” dehan Komandante Munisipiu Dili, Asistente Komisariu Polisia, Orlando Gomes ba jornalista sira iha Komandu Munisipiu Dili
Komandante Munisipiu Dili afirma katak, fo orientasaun ba polisia Transito sira atu kontrola Kareta no Motor sira ne’ebé para arbiru iha estrada ninin iha tempu kalan hodi labele fo impaktu ba movimentu emerjensia sira nian
“ohin hau orienta ona ba iha ita nia transito sira katak, iha tempu kalan tenke kontrola kareta sira ne’ebé mak para iha estrada iha direita no esquerda hodi impede transporte seluk atu liu mos araska, ita tenke kumpri sinais ne’ebé mak iha estrada, husi kareta halo movimentu ba mai, laos estrada sai fali hanesan parajen, ita nia Governo alarga estrada barak iha Dili laran, laos alarga estrada para ita nia kareta kalkalan para iha estrada, maibe alargamentu estrada atu labele difikulta transporte emerjensia sira, atu bele atende ita nia komunidade ho diak” nia informa
Orlando Gomes hatutan katak, iha fulan hira liu ba Komandu Munisipiu hamutuk ho Sekretariu Estadu Asunto Toponia no Organizasaun Urbana (SEATOU) halo operasaun ba Kareta no Motor sira ne’ebé para iha estrada, maibe husik kareta sira kontinua para iha estrada
“kona-ba operasaun ne’e Komandu Munisipiu Dili hamutuk SEATOU iha fulan hirak liu ba ne’e halo operasaun maka durante ne’e ita hare kareta sira ne’e menus iha estrada, maibe kuandu ita husik fali kareta sira ne’e para nafatin tanba ne’e orienta nafatin ba iha ita nia transito ho eskuadra sira kontinua halo operasaun ba kareta sira ne’ebe para iha Estrada” nia hakotu
Jornalista: Mateus F. de Deus
