Dili 17 Maio 2026-Inan Faluk Orlanda da Cruz ho idade 58 hela iha Aldeia Hali Dolar, Suku Hera, Postu Administrativu Cristu Rei, Munisipiu Dili, ne’ebé hamonu matan Ben ho tristeza iha nia uma fohuk durante tinan 14 nia laran iha deit uma lahuk ho dodok, no kalen sai fruzen, ai-rin komesa lahuk no monu, Didin sira komesa kuak
Inan Faluk Orlanda da Cruz hateten, bainhira tempu udan uma laran sai bokon hotu no toba fatin mak la bokon maibe udan akompaña ho anin ne’e fatin sai bokon hotu nune’e hein to udan para
Inan faluk ne’e haktuir, nia moris loron-loron hein deit nia vizinu sira bainhira koa kanku hodi ba Inan Faluk Orlanda hamos hafoin hetan osan $2.00 ka $3.00 hanesan ba nia no osan sira ne’e mak uja ba sosa fos lata, mina no nia presiza
“Tempu udan uma laran bokon hotu, hau nia toba fatin de’it mak la bokon, hau lor-loron kolega sira koa kanku mak lori mai hau hamos, loron ida hau 2$ ka 3$, husi osan sira hau sosa fos mina no buat seluk ne’ebé hau presiza bainhira ema la lori kanko mai hau hamos osan laiha, entaun hau nia maun ida sorin mak tau matan hau, senti triste hau husu ba Governo atu tau matan ba hau” dehan inan Faluk Orlanda da Cruz iha Suku Hera, Aledia Hali Dolar
Enkuantu Osan sira ne’ebé nia hetan husi nia viziñu sira hodi ajuda koa kanku mak fo osan ne’e la sufisiente hodi inan faluk ne’e hadia nia uma, tanba ne’e inan faluk husu ba parte kompetente sira hodi liu-liu Governu hodi bele tau matan ba inan faluk ne’ebé hela ho uma kondisaun grave ne’e
Iha sorin seluk, Viziñu Fernando Goveia da Silva hateten, kondisaun moris Orlanda nian mak lor-loron hamos viziñu sira nia kanku hodi hetan aihan no nia kondisaun uma mos sai at hanesan ne’e no Inan Faluk ne’e antes halo kantaderu kuda modo nian maibe rai nain foti tiha Orlanda la halo buat ida maibe autoridade lokal la tau matan no la hare
“Lorloron nia hamos netik ema nia kanko hodi hetan aihan ruma, kondisaun uma nian mak nune’e duni, durante laiha autoridade lokal sira nunka mai hare, karik sira mai hau sai tiha karik hau la hatene, uluk Oitavu Governo nian mak sira mai rekolla fixa, uluk ne’e kantaderu pedasuk oan ida iha leten halo netik modo, maibe tinan rua ba kotuk ema rain hadau tiha ona ne’ebé ferik mak nune’e de’it ona” Fernando Afirma
Xefe Aldeia Hali Dolar,Clementino Amaral Pereira rekoñese katak, kondisaun uma Inan Faluk Orlanda da Cruz grave duni tanba ne’e dadus submete ona ba Governu maibe sei iha prosesu, nu’udar autoridade loka rekomenda ba Parte Governu atu bele prosesu kona-ba kbi’it laek sira nia moris
“ita nia komunidade ne’e kondisaun mak nune’e hau hatene, dadus durante ne’e ami foti ona maibe sei prosesu, nu’udar autoridade komunitaria buka dalan oioin maibe buat hotu prosesu, rekomenda hela ba governo atu prosesu kbi’it laek sira ne’ebé mak ami hetan iha baze” tenik nia
Jornalista: Mateus F. de Deus
