Díli 03 Jullu 2026 – Polísia Nasionál Timor-Leste (PNTL) liu husi Diresaun Servisu Investigasaun Kriminál (DSIK) no Servisu Migrasaun (SM) halo buska ba sidadaun estranjeiru na’in-7, kompostu husi sidadaun Xineza na’in-6 no Vietnam na’in-1, tanba envolve iha rede krime scam call center.
Ekipa konjunta ne’e PNTL liu husi DSIK hamutuk ho Servisu Migrasaun ne’e hala’o buska iha Fatuhada Hotel XINGYUE VILLA iha oras 11:30 otl hodi konsege kaptura estranjeiru nain 7, Xineza nain 6 no Vietnam 1 inklui feto ida.
Sasan sira ne’ebé autoridade rekolla mak telefone 13, Aipad 3 inklui liña internet Starlink 2 ho sasan sira seluk ne’ebé fasilita sira hodi halo ba atividade Jogu Online Scaming Call Center nian.
Iha fatin ne’e autoridade atua kedan ba Komandu Jeral Caicoli Dili hodi halo detensaun ba sidadaun estranjeiru na’in-7 ne’e hafoin prosesu investigasaun.
PNTL husu kooperasaun husi komunidade atu fo informasaun bainhira haree ka hatene fatin ne’ebé ema sira ne’e hela, atu fasilita prosesu investigasaun no kaptura tuir lei.
Operasaun ne’e kontinua nu’udar parte husi esforsu atu kombate atividade krime transnasionál, liuliu fraude liuhusi call center ne’ebé bele lori prejuízu ba sidadaun sira.
Jornalista: Aniceto da Silva
