Dili 17 Maio 2026-Partidu Fitun (PF) halo reuniaun dahuluk hodi estabelesimentu estrutura ba kongresu nasional nian hodi kompete ba Eleisaun Presidensial, Eleisaun Poder Lokal no Eleisaun Parlamentar
Iha artigu 46 alina 3 konstituisaun Repúblika Demokrátika Timor-Leste (RDTL) ne’ebé deklara katak, sidadaun hotu-hotu iha direitu atu konstitui no iha partidu politiku sira.
Partidu FITUN (PF) hanesan organizasaun politiku, hafoin tuir prosesu naruk ne’ebé ikus mai hetan duni rekoñesimentu husi instituisaun estadu no kompotente husi RDTL nian tanba ne’e Partidu FITUN hetan rekoñesimentu legal, bazeia ba desizaun Tribunal Rekursu publika iha jornal da repúblika série II numeru 11 iha 13 Marsu 2026.
Sekretariu Jéral Interino partidu FITUN, Vasco Viana hatete, Partidu FITUN halo konsellu politika nasional no halo reuniaun dahuluk hodi estabelsimentu estrutura no prepara ba kongresu nasional, nune’e antes halo reuniaun dahuluk Partidu Fitun inagura ba Sede Nasional Partidu FITUN nian
“Partidu FITUN liuhosi konsellu politiku nasional permanente halao enkontru dahuluk ho reprezentante estrutura munisipais no inagura sede nasiónal partidu FITUN nian,” dehan Sekretariu Jéral Viana Viana, liu-liu konferensia imprensa, iha Sede Nasiónal Partidu FITUN, Fatuhada.
Nia informa, ohin Partidu FITUN liuhosi konsellu politiku nasional permanente partidu FITUN realiza mós nomeasaun ba Koordenador interino partidu FITUN iha Munisipiu 13 ne’ebé hetan mós prezensa husi lider nasional Abilio de Araujo.
“Ami mós hato’o ba publiku tomak katak, iha tempu badak partidu FITUN sei realiza atividade politiku sira hanesan konsólidasaun, konferensia no kongresu nasional tuir estatutu partidu FITUN ninian” nia relata.
Iha fatin hanesan, Vice Prezidente partidu FITUN Interino, José Bareto de Jesus argumenta, dadauk ne’e partidu FITUN sei iha Presidente Interino, nune’e iha kongresu nasional mak sei hili Presidente foun no kompleta tan estrutura seluk.
“Prezidente loloos iha kongresu nasional mak sei disidi, ita hili prezidente ne’ebé iha partidu nian oin nomos sekretariu Jéral nu’udar partidu nian fuan, no konsellu politika nu’udar orgaun ne’ebé tetu partidu nian nomos estrutura seluk hotu-hotu iha partidu ne’e nia laran,” dehan nia.
Tanba ne’e bainhira Partidu FITUN realiza kongresu sedu mak sei kompete iha eleisaun sira hanesan poder lokal, prezidensial no parlamentar nian.
Nia haktuir, partidu FITUN harii liu husi obstakulu oi-oin, hahu kedas iha tinan hirak ba kotuk, to’o ikus submete eleitoral konsege priense rekezitus sira no ohin partidu FITUN hetan ona legalizasaun nu’udar partidu politiku iha Timor-Leste
Tanba ne’e, ohin reuniaun dahuluk partidu FITUN nian hodi estabelese estrutura koordenador interino iha Munisipiu sira ba preparasaun ba kongresu nasional tinan oin mai ou sedu liu iha tinan ida ne’e nia laran.
Iha fatin hanesan lider násional Eis-Prezidente Repúblika Abilio de Araujo enkoraja husu ba partidu FITUN foku prinsipal oinsa tun baze hodi konvense povu sira ne’ebé durante lakon ona vontade hodi tuir votasaun iha tinan hirak nia laran.
Durante ne’e observa no nota katak, sidadaun barak mak lakoi ona tuir votasaun ba partidu sira bainhira iha eleisaun, tanba sidadaun barak lakon ona sira nia konfiansa ba promesa sira.
“Ha’u husu labele toba dukur, manu tenki kokorek fali, Fitun tenki kokorek fali atu bele tinan hanesan fitun mai dada dalan. Ha’u prontu atu kontinua apoiu imi, maibe importante mak ne’e ita ohin labele hanoin liu bareira deit, ita tenki buka manan duni. Fitun tenki sai fali frente ida, buka mós partidu sira seluk atu ita bele manan no bele sai alternativu ida” tenik nia.
Jornalista: Aniceto da Silva
