Dili 27 Maio 2026-Unidade Polisia Maritima (UPM) nia existensia ba dala XXIII ne’ebé ho kondisaun simples maibe nakonu ho Espiritu Patriotismu no membru sira iha komitmentu hodi Prontu Servi no defende soberania maritima iha Timor-Leste nian
Komandante Unidade Polisia Maritima (UPM), Superintendente Xefe Polísia, Eugenio Pereira hatete, exiztensia Unidade Polisia Maritima (UPM) ba dala XXIII nia kompromisiu ba instituisaun hodi kontinua ba papel estratejiku iha Timor-Leste liu-liu iha Maritima nian
“Bainhira ita komemora tinan 23 existência Unidade Polisia Maritima nian, ita mos reafirma fila-fali kompromisu institusionál atu kontinua hala’o papel estratéjiku no importante hodi garante fiskalizasaun, protesaun no seguransa ba espasu maritimu nasionál, hodi kombate atividade ilícita sira no krime transnasionál sira, no mos kontribui ba defeza interese estratéjiku Timor-Leste nian, iha domíniu marítimu” dehan Komandante UPM, Superintendente Xefe Polísia, Eugenio Pereira iha Largo Lecidere Dili
Alende iha periodu husi inisiu estabelesimentu ne’ebé Unidade Poilisia Maritima (UPM) infrenta dezafiu ba kapasidade operasional ne’ebé limitadu no iha area rekursu umanu inklui ekipamentus sira, maibe UPM hahu ho kondisaun ne’ebé simples hodi asegura no defende soberania maritima Timor-Leste nian
“Durante períodu inísiu estabelesimentu Unidade Polísia Marítima, instituisaun ida-ne’e enfrenta dezafiu barak no kompleksu. Iha tempu ne’ebá, kapasidade operasionál sei limitadu teb-tebes, tantu iha área rekursu umanu, ekipamentu operasional, infraestrutura, no kapasidade téknika. Unidade Polisia Marítima hahú ho kondisaun ne’ebé simples tebes, maibé ho espiritu patriotismu no komitmentu boot husi membru sira ne’ebé prontu atu defende soberania maritima Timor-Leste nian” nia hatete
Iha fatin hanesan Komadante Jeral PNTL, Komisariu Assistente Polísia Afonso Dos Santos hatete, orgullu ba selebrasaun Unidade Polisia Maritima (UPM) bad ala XXIII ne’ebé iha tempu naruk nia laran UPM dezempeñu no papel importante ba defeza tasi timor nian
“Ho orgulho boot ohin loron ita hotu selebra aniversariu UPM ba dala 23. Tempu nebe naruk tinan 23 nia laran, UPM desempenho ona papel importante ba defesa soberania nasional hodi halo protesaun ba ita nia aguas teritoriais no garantia seguransa maritima Timor Leste” nia dehan
Unidade Polisia Maritima (UPM) hanesan unidade espesializada ida husi Polisia Nasional Timor-Leste (PNTL responsavel ba vigilansia, patrulhamentu, intersesaun no fizkalizasaun iha orla costeira no dominio maritima, kontribui ba prevensaun no kombate kriminalidade no ilisitus sira seluk.
Hanesan nasaun ilha, Tasi representa riqueza fundamental ida ba Timor Leste, Tanba ne’e garanti seguransa maritima hanesan misaun ida ba interese nasional, ne’ebé iha ambito ida ne’e UPM kontinua kombate peska ilegal sira, kontrabandu, imigrasaun ilegal no ameasas transnasionais sira seluk.
Enkuantu rejultadu ne’ebé alkansa iha tinan 2025 demostra ona servisu unidade ne’ebé realiza patrullamentu maritimas hamutuk 244, terestre 2.499 no resista ona 30 detensaun ne’ebé krime kontrabandu sira
“Resultadu sira nebe alkansa ona iha tinan 2025 demonstra servisu unidade ida ne’e. realiza ona patrulha maritimas 244 no patrulhas terestre 2.499. regista 30 detenções relasiona ho krime kontrabandu, halo apreensaun ba produtos ilisitus oi-oin espesialmente tabako no Bebidas. UPM mos halo salvamentu ba ema nain 11 iha tasi, ida ne’e hatudu nia prontidaun operasional iha asaun sira buska no salvamentu, asistensia ba komunidade sira iha kosteira no fo apoio humanitario iha situasaun emergensia, ida ne’e hatudu sira nia komitmentu hodi kontribui diretamente ba protesaun vida humana iha tasi” tenik nia
Nia afirma, imi nia profesionalismu, disiplina no dedikasaun merese hetan rekonesementu husi instituisaun no povo timorense, servisu iha tasi ejiji koragem, espirito misaun no sentido bo’ot ba responsabilidade iha tasi maritima nian.
Jornalista: Aniceto Da Silva
