Dili, 25 Juñu 2026 – Vise-Primeiru Ministru, Ministru Kordenadór Asunto Ekonomia no Ministru Turizmu no Ambiente Francisco Kalbuady Lay hateten, governu kontínua apoiu Saudozu ne’ebé Eis Prezidente Repúblika, Francisco Guterres “Lu-Olo” nia oan sira nia estudu nune’e kontinua lao tuir saudozu nia ain fatin
“Ita hamutuk apoia malu nafatin hodi fó ba família liuliu ba labarik sira ne’ebé sei eskola hela. Nune’e bele kontinua sira-nia estudu hodi bele la’o tuir saudozu Lú Olo,” dehan Primeiru Vise-Primeiru-Ministru, Ministru Kordenadór Asunto Ekonomia no Ministru Turizmu no Ambiente Francisco Kalbuady Lay, hafoin preseta Omenajen ba Saudozu Francisco Guterres Lu-Olo, iha nia residénsia Farol
Nia dehan liu husi forsa ne’ebé parte hotu-hotu iha hodi tau hamutuk fó forsa ba família no ba oan ki’ak ho inan faluk, tanba ne’e lori Governu nia naran hato’o sentidu kondolénsia ba família tomak, klaru ba Komité Sentrál FRETILIN
“Ha’u iha hela Portugál mak rona Maun Lú-Olo iis kotu, no ha’u husu Maun Bo’ot no fila kedas mai, nu’udar Governu ho estrutura tomak hato’o sentidu kondolénsia ba família tomak, klaru ba Komité Sentrál FRETILIN. Ita Timor lakon ema di’ak ida hanesan Lú Olo, durante ha’u koñese nia desde tun husi ai-laran mai, maibé prontu buat hotu-hotu Maromak mak deside nune’e ita reza nafatin haraik ba Na’in Maromak fó fatin ne’ebé di’ak ba Maun Lú Olo,” nia esplika
Enkuantu, hanesan Vise- Primeiru Ministru Koiñese Saudozu Francisco Guterres Lu-Olo hahú husi tinan 1999 ho kamarada sira seluk no mós Sekretáriu Jerál Partidu FRETILIN.
“Ha’u hamutuk ho Maun Lú dezde 1999, ho kamarada sira seluk, Sekretáriu Jerál FRETELIN, Mari Alkatiri, to’o harii Asembleia Konstituente no Saudozu Francisco Guterres Lú Olo sai Prezidente Asembleia Konstituinte. Ha’u la haluha nia tanba nia ema ne’ebé gosta toka no ha’u mós toka, nia ema ida ladún ko’alia barak, sente lakon ema ne’ebé besik liu,” nia hatutan
Entretantu tuir observasaun Jornalista Zeus News iha terenu nota katak Vise-Primeiru-Ministru, Ministru Kordenadór Asunto Ekonomia no Ministru Turizmu no Ambiente Francisco Kalbuady Lay ho nia kometiva to’o iha Rezidénsia Saudozu Francisco Guterres “Lu-Olo” tuku 14:49 hodi presta omenajen ba Saudozu Antigu Prezidente Repúblika, Francisco Guterres “Lú Olo” nia isin mate iha Farol.
Jornalista: Aniceto da Silva
