Dili, 24 Jullu 2026-Ministeriu Transporte no Komunikasaun (MTK) hasoru malu ho Estudante Universitáriu Timor-Leste (EUTL) halo dialogo ne’ebé MTK sei halo alterasaun dekretu lei nú. 17/2026 loron 6 maio 2026 hodi hatun Taxa Administrativa Ba Transporte publiku no tuir nesesidade povu iha territóriu timor laran tomak nian.
Ministru Transporte no Komunikasaun (MTK), Miguel Marques Gonçalves Manetelu hatete, Ministeriu akompaña preokupasaun husi sosiedade sira konaba Taxa Administrativa Ba Transporte Publiku tanba ne’e husi representante Estudante Universitáriu Timor-Leste (EUTL) hodi hatama karta eskrita ba MTK nune’e Ministru bolu kedan halo dialogo ba Taxa Administrativa ne’e.
“Hau hatete ba kolega sira ministeriu akompaña preokupasaun husi ita nia sosiedade publiku sira inklui ikus mai husi movimentu EUTL hatama sira nia karta ida para husu ministeriu atu fo resposta eskrita ne’ebé preokupasoens sira ha’u le husi surat ne’e mai hau hanoin katak invezde ami fo respostas eskrita di’ak liu ha’u bolu para iha enkontru dialogo ida para depois bele iha konkluzaun ida ne’ebé maka laos atu akomoda hotu mais buat belun preokupasoens sira ne’ebé sira hato’o ita hare iha razaun” dehan Ministru Transporte no Komunikasaun (MTK), Miguel Manetelu iha MTK caicoli dili
Governante mos salienta, iha preokupasaun husi publiku sira katak Taxa Administrativa ne’e sa’e makas maibe kontinua implementa mak halo avaliasaun no akompaña maibe iha impaktu ba dekretu lei ba Taxa Administrativa liu-liu ba povu Timor-Leste tomak.
“Hanesan intervista sira liu ba hau hatete dehan lae implementa ba ami observa evalua halo avaliasaun halo akompañamentu se iha impaktu husi dekretu lei Taxa ne’e liu-liu ba ita nia populasaun enjeral ministeriu ba oin sei hare para oinsa maka atu halo ajustamentu ka halo alterasaun ba dekretu lei ne’e” nia salienta
Ministru esplika, Ministru Transporte no Komunikasaun (MTK) ho Estudante Universitáriu Timor-Leste (EUTL) halo dialogo kona-ba ligadu ho dekretu lei nú. 17/2026 loron 6 Maio 2026 ba Taxa Administrativa ne’e nia laos jurista, maibe husi desizaun politika atu regulariza implementasaun, maibe esplikasaun to iha faze ikus mai iha konkordansia nune’e fo tempu ba Ministru hodi halo implementasaun ba dekretu lei ne’e.
“ohin sasan sira ami koalia, hau esplika buat balun ligadu dekretu ne’e hau laos jurista mais tanba buat ne’e tama mai husi desizaun politika maka depois hamosu dekretu ne’e atu regulariza nia implementasaun ne’e ne’ebé hau maka esplika, ikus mai alin sira koalia i ami to ba konkordansia ida katak sim, hau husu para fo tempu implementasaun lao ba mais fo tempu para depois, momentu ida atu halo alterasaun ne’e buat ne’ebé mak halo alterasaun ne’e sai ba labele hetan tan reazen ida ne’ebé presiza tempu atu hare sasan lubuk ida tuir sirkuintansia sira ne’ebé mak iha para depois alterasaun ne’ebé mak iha futuru mai atu halo ne’e bele akomoda buat ruma” nia esplika
Enkuantu pedidu husi Estudante Universitáriu Timor-Leste (EUTL) atu hatur fila fali diploma ministerial ne’e uluk maibe la to iha ne’eba tanba revoga tiha ho osan ne’ebé atu regulariza ne’e la ho diplomata no tenke tuir dekretu lei.
“Pedidu husi alin estudante sira hanoin katak atu hatur fila fali diploma ministerial uluk, hanesan ohin hau hatete katak lae ita la fila ba iha ne’ebá ona ita revoga ona, liu-liu regulamentu sira ne’ebé atu regulariza konaba osan ne’e la ho diplomata tenke ho dekretu lei tanba ne’e maka ohin hau hatete lae se iha ajustamentu ruma halo ajustamentu iha dekretu lei ne’e para halo alterasaun ne’e laos atu fila fali atu hatur fila fali diploma ministerial ne’ebé maka vigora iha 2010” nia informa
Iha fatin hanesan Porta-Voz Estudante Universitáriu Timor-Leste (EUTL), Natalizio Nunez Martins hatete, ezizensia husi EUTL ba Ministériu Transporte no Komunikasaun (MTK) bazea ba petisaun ne’ebé antes ne’e submete ona iha MTK, tanba iha loron 24 Jullu ne’e halo dialogo ne’ebé Ministru halo konkordansia ona hodi halo alterasaun dekretu lei nú. 17/2026 Loron 6 Maio 2026 ne’e.
“Ezizensia ne’ebé maka ohin ita hato’o liu husi dialogo maka bazea ba petisaun ne’ebé ita hatama ona ba ministeriu, ohin konsege dialogo durante oras rua hanesan ne’e iha konkordansia balun, Ministru rasik mos konsidera ezizensia balun ne’ebé presiza atu hadia rekoñese katak iha dekretu iha diploma ministerial uluk no dekretu lei foun ne’ebe maka iha kondisaun balun presiza atu hadia. Diploma ministerial ne’e bele hatur ou bele mos mantein dekretu foun mais nia kondisaun no aplikasi sira iha laran ne’e tuir nesesidade sidadaun hotu nian ida ne’e mak ita nia ezizensia” dehan porta-Voz EUTL
Entre tantu, iha inkontru dialogo entre Ministeriu Transporte no Komunikasaun (MTK) no Estudante Universitáriu Timor-Leste (EUTL) halo ona konkordansia sei halo alterasaun ba dekretu lei ne’ebé dadaun ne’e vigora hela, laos ba artigu hotu-hotu maibe ba artigu sira ne’ebé la kondiz ho sidadaun sira nia moris.
Jornalista: Aniceto da Silva
