Manu-Fahi, 19 Jullu 2026-José Vicente ho idade 50 kondisaun Defisiensia Mentál Tinan 10 ona hela iha uma fohuk ida iha Aldeia Fatuku, Suku Holarua, Posto Same Vila, Munisipiu Manu-fahi, ne’ebé besik monu ona no lori de’it ai mak tonka, kondisaun ida ne’e fó risku tebes ba José Vicente bainhira iha tempu udan no Anin bot ho kondisaun ne’e José Vicente nia Espoza ho oan nain 8 deside ba hela ketak
Ema moris iha naroman nia laran hodi kontenti hamnasa haksolok maibe José Vicente hela iha nakukun nia laran hodi rona deit ema nia kontente, haksolok no hamnasa. Tanba deit José Vicente nia kondisaun oan ho ferik oan deside hodi ba hela ketak no husik Aman lae iha uma dodok ida ne’e nia laran no la tau matan ba nia Laen ka Aman.
Defisiensia Mentál, José Vicente hatete senti tauk bainhira iha udan boot no anin boot uma monu no hanehan, Defisiensia Mebtál ne’e hakarak atu hela iha uma diak ruma liu husi Estadu nia tulun
“senti la diak triste hela uma ne’e, udan bot no anin bot kalan toba tauk uma monu hanehan hau,” haktuir Defisiensia Mentál Vicente, iha suku Hola-rua
Vasco da Costa hanesan viziñu ne’ebé sempre tau matan ba Defisiensia Mentál José ne’e haktuir, sempre tau matan hela ba nia hodi te’in nia han no hola kafé masin midar fo ba nia maibe ida ne’e mak kbiit husi viziñu ne’e tanba nia kondisaun Defisiensia Mentál ne’ebé hela iha uma ne’e ho kondisaun grave no fo impaktu ba nia vida.
“Ami te’in lori ba nia, dala ruma hau ba kios hau hola hela café Masin midar susu ben sigarru fó hela ba nia la barak, maibe tanba nia ho kondisaun Defisiensia Mentál sempre kaer kro’at ne’ebé ita mos tauk, nia mak ho kondisaun hanesan ne’e maibe nia ba sama hela iha kantór SAS maibe nia la’ós Funsionariu ida, fulan-fulan ema hanoin mak ema fó hela 1$ 2$ ba nia husi osan ida ne’e mak hola netik fos ruma ba nia, hau horbhra dehan ba nia oan sira atu hola besi hodi hadia netik nia uma maibe nia lakohi” Tenik Viziñu Vasco da Costa
Xefe Aldeia Fatuku Marcelino Noronha rekonese duni José Vicente nia kondisaun moris, antes ne’e hetan ona ajuda husi Governo, maibe ho kondisaun Defisiensia Mentál José Vicente labele halo uma, Autoridade Lokal ne’e husu Estadu hodi halo netik uma ida Defisiensia Mentál ne’e
“nia uma mak ne’e duni Antes ne’e Estadu ajuda ona semente 40 no kalen 40 ho osan, fo mai nia la halo ida, nia moras Mentál nia atu halo hanusa, Estadu halo diak tiha mak entrega, ita atu fó ba nia labele, tenik
Autoridade Lokal ne’e rekomenda ba Ministeriu kombatentes atu hare ema sira ho kondisaun sira hanesan, no mós Parte Notariadu atu bele trata ema sira nia kondisaun Defisiensia nia dokumentu ne’e atu sira bele hetan ajudus husi Estadu no Governo
Xefe Suku Holarua, João Corte-Real hateten kondisaun Defisiensia Mentál ne’e husi Ministériu Soliedariedade Sosial no Inkluzaun (MSSI) ba hare ona, no simu ona material uma nian maibe nia la halo tanba José Vicente hela iha ema nia Rai
“Atu klasifika kona-ba Jose Vicente, momentu ne’e hau rasik mak lori Sosiál to mai hare uma, sosial dehan uma hanesan ne la tama kritériu, maibe hau dehan uma ida tonka hanesan hasai tiha Ai nia monu, ne’ebé sira lori tiha Material uma nian ida mai kompleto, to agora uma la halo tanba rai nain mak impede tanba José Vicente hela iha ema nia rai” afirma Xefe Suku Holarua
Sekretariu Asunto Sosial Manu-Fahi, Aleixo de Deus, rekoñese José Vicente nia uma besik monu ona satan netik ai tonka lori ona Diretur sosial Munisipiu Manu-Fahi ba hare José Vicente nia kondisaun uma nia, no la promete atu halo
“Relasiona ho uma ida iha Sede Suku oin ne’e fatin ida nia hela ba ne’e mas rai ne’e la’ós ninian ne’ebé uluk iha apoiu balun mai mas la jadi tiha, tanba rai ne’e la’ós ninian ema la fó tempu atu halo, fatin ida ne’e monu tiha ona lori mak tonka hela uluk hau ba hare ona, hau mai ho diretur sosial dala ida, ita hare ona ita la promete ba malu tanba ita hare ona” Afirma Sekretariu Asunto sosial Munisipiu Manu-Fahi
Tuir obsersaun Jornalista Zeus News iha Defisiensia Mentál José Vicente nia uma nota katak, kondisaun uma grave airin uma nia no didin uma nian fohuk hotu ona, no besik monu maibe José Vicente lori Ai mak tonka netik hodi haman an ba
Jornalista: Mateus F. de Deus
