MANATUTO, 23 Outubro 2026 – Sekretaria Estadu Komunikasaun Sosiál (SEKOMS) hamutuk ho empreza VORAKAI, LDA hala’o formasaun kona-ba jurnalizmu báziku no komprensaun ba sosiedade dijitál iha era modernu ba komunidade sira iha Suku Aubeon, Postu Administrativu Barique, Munisípiu Manatuto. Formasaun ne’e hala’o durante loron lima, hahú hosi loron 19 to’o 23 Outubru 2026.
Xefe Suku Aubeon, Domingos Gonzaga, hato’o ninia agradesimentu boot tebes ba SEKOMS ne’ebé mak hili ona Suku Aubeon nu’udar fatin ba sosializasaun programa Suku Dijitál.
Iha ninia intervensaun, Autoridade Lokál ne’e mós hato’o apresiasaun kle’an ba empreza VORAKAI, LDA ne’ebé servisu hamutuk ona ho Ministériu Transporte no Komunikasaun (MTK) liuhosi Diresaun Nasionál Informasaun no Komunikasaun (DNIK) hodi monta fasilidade internet STARLINK iha sede suku.
“Konektividade internet ne’e ajuda no fasilita tebes ami atu aselera prosesu hatama dadus (input data) suku nian liuhosi sistema informasaun SIGSA,” tenik Xefe Suku Domingos Gonzaga.
Nia mós husik hela mensajen katak ho prezensa plataforma Suku Dijitál ne’e, bele lori fasilidade no konveniénsia ba komunidade sira atu asesu informasaun kona-ba suku nian hosi kualkér fatin no iha kualkér tempu.
Formasaun ne’e la’ós de’it envolve komunidade Aubeon, maibé mós hosi suku seluk. Reprezentante partisipante ida hosi Suku Sikone-Diloli hato’o ninia agradesimentu ba fiar ne’ebé fó ba sira atu hola parte iha prosesu transformasaun dijitál ne’e. Nia mós hein katak iha tempu oin mai, SEKOMS bele implementa mós programa Suku Dijitál iha sira-nia suku.
Programa Suku Dijitál mak inisiativa estratéjiku governu nian liuhosi SEKOMS atu habelar transformasaun dijitál to’o iha nivel baze (suku). Programa ne’e ho objetivu atu moderniza administrasaun lokál, hadi’a prestasaun servisu públiku, no kapasita sidadaun sira atu hatene uza teknolojia informasaun iha era modernu, hodi nune’e bele redús lakuna dijitál (digital divide) iha Timor-Leste.
Atu suporta vizaun dijitalizasaun ne’e, to’o ohin loron, empreza VORAKAI, LDA mós konsege fó ona ninia kontribuisaun boot hodi monta rede internet iha suku hamutuk 450 iha territoriu Timor-Leste tomak, hodi garante katak suku sira iha asesu ba konektividade ne’ebé lailais no seguru.
Ekipa Zeus News
Obrigado ba SECOMS ne’ebe invove ona Vorakai hodi bele serbisu hamutuk ba transformasaun dijital iha rai Timor doben ne’e.