Díli, 05 Agostu 2026 – Ekipa konjunta husi Diresaun Servisu Investigasaun Kriminál (DSIK), Servisu Migrasaun no Servisu Nasionál Intelijénsia (SNI), iha kuarta-feira ne’e iha tuku 7:00 Otl kalan, halo operasaun buska ba uma ida iha Aldeia Kasnafar, Suku Dare, Postu Administrativu Dom Aleixo, Munisípiu Díli, ne’ebé simu informasaun kona-ba alegasaun atividade jogu online Scaming Call Center no deskonfia envolve husi sidadaun estranjeiru sira
Maibé, bainhira ekipa konjunta to’o iha fatin, sidadaun estranjeiru sira ne’ebé suspeita ba uma ne’ebé sira hela ba ne’e ekipa konjunta sira detekta duni katak sidadaun sira halo atividade illegal Jogu online Scaming Call Center, maibe sidadaun sira ne’e sai antes ona iha loron hirak liu ba no husi uma ne’e mamuk.
Enkuantu iha operasaun ne’e autoridade seguransa sira hetan de’it evidénsia balun, hanesan komputador unidade rua no ekipamentu internet Starlink unidade tolu, ne’ebé iha Indisiu forte utiliza duni ba aktividade Jogu ilegal Online Scaming Call Center ne’e.
Nain ba Uma, Jorge Martins, hatete sidadaun estranjeiru sira aluga uma ne’e hahu iha loron 01 fevereiru 2026, kada fulan selu uma U$2.200, maibe uma nain lahtene katak sidadaun estranjeiru sira ne’e loke atividade Jogu Online Scaming Call Center iha ne’e.
“Sira hahú hela iha ne’e desde fulan Fevereiru. Kada fulan sira selu renda hamutuk US$2.200. Hau la hatene katak sira halo jogu online ilegál ka atividade scam call center, depois sira mai aluga uma ne’e sira nia Patraun ne’e ho timoroan ida mak hanesan matadalan mak lori mai hodi asina kontratu hodi aluga uma,” dehan Uma Nain, Jorge Martins iha aldeia Kasnafar
Uma nain kopera ho parte autoridade seguransa hodi halo buska fatin ne’e hodi identifika no buka evidensia balun ne’ebé sira halo atividade jogu online ne’e
Jorge Martins dehan, durante sidadaun estranjeiru sira kompleta ona arendamento ba uma ne’e sira la iha informasaun ba uma nain hodi sai husi uma ne’e, maibe antes informa ona ba uma nain katak sira tama uma la iha ema ida atu ba vizita sira tantu uma nain mos la ba hare ka vizita sira.
“Sira sai mos laiha koñesimentu ba ami, no ami la hatene kona ba jogu scaming ne’e, no sira antes mos hatete ba ami kaundu ami hela ona iha ne’e atu uma nain ga se deit labele mai tan iha fatin ne’e” nia dehan
Iha sorin seluk, Xefi Aldeia Kasnafar, Agapito Soares haktuir, durante ne’e autoridade lokal la iha informasaun konaba sidadaun estranjeiru sira ne’ebé aluga uma iha aldeia ida ne’e, ne’ebé autoridade husu ba parte seguransa sira hodi buka nafatin sidadaun estranjeiru sira ne’ebé halai ona ne’e hodi halo investigasaun ba sira
“Autoridade lokal la iha koñesimentu kona-ba sidadaun estranjeiru sira ne’ebé hela iha uma ne’e. Ami husu ba PNTL atu kontinua buka tuir sira ne’ebé halai husi fatin ne’e, atu bele halo investigasaun tuir lei,” dehan Xefe Aldeia Kasnafar Agapito Soares
Enkuantu ekipa konjunta sira rekolla ba dokumentu balun hanesan karta deklarasaun entre uma nain ho sidadaun estranjeiru ne’ebé aluga uma ne’e iha asinatura no pasaporte husi sidadaun estranjeiru nian.
Iha observasaun husi Jornalista Zeus News iha fatun kompostu uma ne’e iha kuartu 10 ne’ebé iha kuartu sira tau kama hat ba leten maibe ho kama andar, ekipa mos halo revista ba fatin ne’e hetan ekipamentus hanesan sasan eletroniku, uma laran ropa sumasu kadeira sira ne’e soe naklekar iha uma laran no kuartu laran.
Jornalista: Aniceto da Silva
