Dili 15 maio 2026-Provedoria Direitus Humanus no Justisa (PDHJ) nia ekipa halo ona fiskalizasaun ba kazu ne’ebé prizoneiru sira halo agresaun fisiku hasoru dadur sira iha prizaun Becora no mos ekipa halo ona komunikasaun ba dadur ne’ebé sai vitima ba agresaun fisika no halo komunikasaun ba advogadu husi vitima ne’e
Provedoria Direitus Humanus no Justisa (PDHJ), Virgilio da Silva Guterres “Lamuka” hateten, lamenta ho aktu sira ne’ebé husi Guarda Prizoneiro sira halo agresaun fisika ba Dadur sira iha prizaun Becora
“Provedoria Direitus Humanus no Justisa lamenta agresaun fisika ne’e i kondena hahalok ne’ebé ke guarda prizonal sira hasoru dadur iha prizaun Becora, dadur ne’ebé ke sai vitima ne’e ema estranjeiru” dehan PDHJ Virgilio Guterres “Lamuka” iha Excelsior Resort, Pantai Kelapa liu husi komunikadu imprensa
Provedoria Direitus Humanus no Justisa (PDHJ) halo ona komunikasaun ho Ministerio Justisa (MJ) hodi foti medidas ba kazu halo agresaun fisiku ne’ebé Guarda Prizoneiru sira hasoru Dadur iha Prizaun Becora
Enkuantu, Provedoria Direitus Humanus no Justisa (PDHJ) hodi hato’o ba sidadaun nasional sira uha dadur ne’e atu submete no tuir prosesu tribunal hodi kumpri pena iha justisa balun hetan ona pena no balun hein prosesu julgamentu iha tribunal
“oportunidade ida ne’e provedor hakarak hato’o katak maluk sira sidadaun sira atu nasional ka estranjeiru ne’ebé ke sai prizoneiru sai dadur iha prizaun sira iha ne’eba atu submete ba prosesu tribunal ninian i mos atu kumpri sira nia pena, los katak sira iha konflito ho lei ne’ebé ke vigora iha rai ida ne’e tanba ne’e maka balun hetan ona pena balun sei iha prosesu julgamentu, maske sira halo infrasaun ruma hasoru lei ne’ebé ke vigora iha rai ida ne’e maibe hanesan ema hanesan sidadaun sira kontinua iha direitu humanu, direitu atu hetna tratamentu ne’ebé ke dignu husi guarda prizonal sira ne’ebé estadu selu atu tau atensaun dadur sira ne’e” dehan PDHJ
Direitus humanus aplika ba prizoneiru sira hotu nune’e hodi halo tratamentu humanu inklui sira nia integridade fisiku no direitu atu asesu ba aihan nutritivu, direitu ba tratamentu saude, direitu hetan visita ho komunikasaun husi nia familia no direitu ba sira nia advogadu ne’ebé fo asistesia ba sira, tanba ne’e guarda prizoneiru sira hodi fasilita no garante direitus humanus ne’e garantidu iha prizaun.
Dadur mos iha direitu atu la bele hetan torturasaun husi parte guarda prizoneiru sira tanba iha lei konstituisaun mos garante ba dadur sira hodi hetan tratamentu ne’ebé dignu ba sira
Provedoria Direitus Humanus no Justisa (PDHJ) husu ba Ministeriu Justisa (MJ) tanba prizaun tutela ba Ministeriu Justisa (MJ) hodi halo investigasaun no foti medida hasoru guarda prizoneiru sira ne’ebé viola sira nia komprimisiu etiku hodi halo agresaun fisiku hasoru dadur ne’e
Nia akresenta, Provedoria Direitus Humanus no Justisa (PDHJ) rekolla informasaun ne’e husi guarda prizoneiru nain 6 halo agresaun fisiku hasoru dadur iha Becora no iha guarda prizoneiro nain 4 foun, nain 2 tuan
“husi informasaun ne’ebé ke ami rekolla katak iha guarda prizonal nain neen maka halo agresaun fisika hasoru dadur ne’e, sira nain hat, guarda prizonal nain hat ne’e foun i guarda prizonal rua maka tuan, husu atu ministerium justisa loke investigasaun atu nune’e foti medida ne’ebé ke fo rigor bele to posibilidade atu despede ema sira ne’ebé gurda prizonal ne’ebé ke viola regras liu-liu hahalok ne’ebé hamoe estadu hamoe entidade justisa Ninian” nia haktou
jornalista: Aniceto da Silva
