DILI, 24 Maio 2026-Konsileiru Maximu Partidu Kmanek Haburas Unidade Nasionál Timor Oan (KHUNTO), José dos Santos “Naimori Bucar” hatete Timor-Leste presiza Feto ida ho fuan boot hodi servi Nasaun ne’e, atual Presidente Khunto mantein ba Presidente da Republika ba Periodu 2027-2032
“Sim, hakarak atu hateten ba ita bo’ot sira katak Timor ne’e presiza feto ida ne’ebé fuan boot atu ne’e para bele servi nasaun ne’e ho di’ak, nia (Prezidente partidu) hakarak duni atu kandidata aan”, dehan José dos Santos “Naimori Bucar” ba Jornalista sira iha Salaun Maubai, hafoin remata pose ba estrutura foun iha Posto Dom Aleixo
Naimori hateten, razaun KHUNTO hili Armada Berta kandidata aan ba Prezidente Repúblika 2027-2032 tanba hakarak Timor -Leste lidera husi feto ida ne’e mehi Partidu KHUNTO nian
“Tuir loloos ohin ha’u la ko’alia ou labele fó sai, maibé tanba nasaun Timor-Leste ita-nia Amo Papa hateten katak la’ós terra Santo, maibé terra Santa, ne’e presiza feto mak lori nasaun ne’e ba oin, ida ne’e de’it, ne’e ami nia mehi, Timor oan nia mehi”, nia afirma.
Hatan bainhira mak formaliza kandidatura Armanda Berta nian José dos Santos hateten: “ita hein husi Prezidente.Prezidente fó sai ona ita prontu”,
Nia dehan, Prezensa KHUNTO hakarak tuir eleisaun prezidensial tinan oin ne’e la’ós atu kompete ho líder sira maibé hatudu de’it katak povu hadomi líder ida ne’ebé ho fuan boot no honestidade
“Ita la kompete ho sira maibé ita rua hatudu katak lideransa ne’e povu hadomi ida ne’ebé ida ne’e ita hakarak hatudu. Lideransa hotu-hotu ita-nia hotu, lideransa se de’it bele servisu nasaun ida ne’e”, nia dehan.
Nia dehan, maibé ne’e depende ba povu atu hili bainhira sira rona programa ne’ebé diak mak povu sei hili nune’e servi povu ho dignu
Jornalista: Mateus F. de Deus
