Dili 28 Maio 2026-Kantora joven potensial Luciana Verdial Magno ofisialmente asina ona kontratu eskluzivu ida ho rótulu ka label gravasaun Zeus Legacy Records hodi produz single foun ho titlu, “Quero-te Perto”.
Serimónia asina kontratu ne’e hala’o iha ofisina Zeus Legacy Records reprezenta husi Eligio Moniz do Rego nu’udar Produtór Ezekutivu no akompaña husi Mario Pinto nu’udar Video Producer.
Musika Titulu (Quero-te Perto) ho signifikativu “Ha’u hakarak ó besik” iha lian portugés) maka múzika ho genre romantic indice pop. Obra ida-ne’e prevene atu dada atensaun hosi foin-sa’e sira tanba ninia lirika poétika no arranju múzika ne’ebé furak, kombina ho Luciana nia karakter vokál ne’ebé distintivu.
Produtór Ezekutivu, Eligio Moniz do Rego hatete, kolaborasaun ne’e reprezenta investimentu ne’ebé signifikativu hodi entrega servisu ne’ebé maduru ho kualidade aas ho kontratu ne’ebé konkorda ona kobre pontu produsaun xave rua nian
“Produsaun Áudiu: Produsaun áudiu sei hala’o ho profisionál iha bandeira Zeus Legacy Records nia okos, hodi garante vokál no arranju muzikál ho kualidade aas.
Produsaun Vídeo Múzika: Kontratu mós fasilita produsaun vídeo múzika sinematográfiku ida, ne’ebé planeia atu tau iha telón de fondo sidade furak Dili, Timor-Leste, hodi reforsa knananuk ne’e nia mensajen romántiku no estétiku”
Alende ne’e husi produtor Ezekutivu sente orgullo no simu Kantora Luciana Verdial Magno hamutuk ho familia Zeus Legacy Records ne’ebé lori musika ho titulu Quero-te Perto ho nia talentu estraordinario ba kombina musika ne’e
“Ami sente kontente tebes atu simu Luciana Verdial Magno iha família Zeus Legacy Records. Ninia talentu estraordináriu, kombina ho múzika ‘Quero-te Perto’, hanesan kombinasaun perfeitu ida. Ami iha kompromisu tomak, la’ós de’it ba prosesu gravasaun áudiu nian, maibé mós ba preparasaun konseitu vídeo klip ida ne’ebé konseitu vizuál furak sira hodi apoia gravasaun single ida-ne’e,” afirma Eligio hafoin serimónia asinatura
Ho kompletasaun akordu ne’e, produsaun ba single no video múzika ba “Quero-te Perto” sei hahú iha tempu badak ba sira ne’ebé gosta múzika iha Timor-Leste sei rona kolaborasaun ida ne’ebé prontu atu lori kór foun ba indústria múzika nasaun nian ba global.
Jornalista: Mateus F. De Deus
