Maliana, 02 Outubru 2026 — Grupu Juventude Kriativu Moris Diak (JKMD), ne’ebé kompostu husi joven nain 9, hahu inisiativa rasik hodi kria kampu traballu liuhusi atividade hakiak ikan bee-midar iha Mota Bulobu, Suku Ritabou, Postu Administrativu Maliana, Munisípiu Bobonaru.
Koordenador Grupu Juventude Kriativu Moris Diak (JKMD), Januario Soares Tavares, hatete katak grupu ne’e hahu iha tinan 2020 ho inisiativa husi jovem nain 9, kompostu husi feto nain 2 no mane nain 7.
Nia hatete, iha inísiu grupu ne’e hahu ho kolam rua, maibé tanba kondisaun bee la diak, sira muda ba fatin atual no aumenta kolam sira to’o hamutuk 10, inklui kolam ida ne’ebé boot.
“Ami nia atividade hahu hala’o iha tinan 2020. Ami, jovem nain 9, halo inisiativa rasik no tau osan hamutuk. Iha inísiu ami hahu ho kolam rua, maibé tanba ami haree bee la diak, ami muda mai iha fatin ne’e. Agora ami iha kolam hamutuk 10,” dehan Januario.
Nia esplika katak, difikuldade prinsipál ne’ebé grupu hasoru mak fornese hahan ba ikan no hetan ikan-oan tanba stok limitadu. Aleinde ne’e, lokalizasaun kolam ne’ebé besik mota mos sai risku bainhira udan boot no bee mota sae.
“Difikuldade ne’ebé ami hasoru mak konaba hahan ikan no ikan-oan. Dalaruma ami sosa stok, maibé stok ne’ebé ami hetan limitadu. Difikuldade seluk mak mota, tanba bainhira udan boot ami tauk bee sae no bele halo risku ba ikan sira. Ami sei esforsu nafatin no iha planu atu halo lutu, atu animal sira labele tama arbiru no ikan-oan bele seguru,” nia hatete.
Ba futuru, Grupu Juventude Kriativu Moris Diak planeia atu aumenta no hadi’a tan área hakiak ikan, ho objetivu atu aumenta produsaun no bele distribui ikan ba merenda eskolar iha Postu Administrativu Maliana.
Dadaun, sistema merkadu grupu nian sei bazeia liuliu ba konsumidór sira ne’ebé mai diretamente ba fatin, tanba produsaun sei limitadu no seidauk iha kapasidade atu distribui ba merkadu boot ka programa merenda eskolar.
Januario hatete katak, iha inísiu grupu ne’e sosa ikan-oan kuaze 2.000, ho osan ne’ebé joven nain 9 tau hamutuk.
“Primeiru vez ami sosa ikan-oan hamutuk 2.000. Ami jovem nain 9 tau osan hamutuk, depois ami mak sosa no hakiak rasik,” nia hatete.
Jovem nain 9 ne’e hahú atividade ho kontribuisaun osan hamutuk US$300 hodi sosa ikan-oan no hahú atividade hakiak ikan.
Diretór Ezekutivu Centro Juventude Bobonaro (CJB), Alsino Lopes, afirma katak Grupu Juventude Kriativu Moris Diak hetan apoiu husi CJB liuhusi programa empreendedorismu juventude, ho apoiu osan US$1,000.
“Grupu ne’ebé agora iha atividade koileta ikan ne’e hetan apoiu husi Centro Juventude liuhusi programa empreendedorismu juventude. Iha momentu ne’e ami la fó apoiu material, maibé ami fó apoiu osan ho montante US$1,000,” dehan Alsino Lopes.
Nia hatete katak Centro Juventude Bobonaro, nu’udar instituisaun ne’ebé fó atensaun ba dezenvolvimentu juventude iha Munisípiu Bobonaru, sei kontinua buka dalan atu apoia jovem sira ne’ebé iha kreatividade no inisiativa atu kria atividade ekonomia.
Centro Juventude Bobonaro mos planeia atu buka parseria ho Governu, inklui Ministeriu Juventude, Desportu, Arte no Kultura (MJDAK), hodi responde ba dezafiu no nesesidade jovem sira iha terenu.
“Ami hanoin Centro Juventude hanesan responsavel ba jovem iha Bobonaru. Ami sei kontinua halo planu atu bele atinji jovem sira ne’ebé iha kreatividade. Ami sei buka parseria, liuliu ho Governu, no lori preokupasaun no dezafiu sira ba MJDAK atu bele tulun responde ba problema sira ne’ebé jovem hasoru iha baze,” nia relata.
Iha sorin seluk, Presidente Autoridade Munisipál Bobonaru, Paulo Moniz Maia, hatete katak Autoridade Munisipál sei fó atensaun ba preokupasaun jovem sira, inklui problema bee ne’ebé bele afeta atividade hakiak ikan.
Nia afirma katak Autoridade Munisipál sei servisu hamutuk ho juventude, la haree diferensa entre grupu, maibé haree juventude nu’udar parte importante husi komunidade no dezenvolvimentu Munisípiu Bobonaru.
“Konaba problema juventude nian, hanesan Presidente Autoridade, hau hakarak kontinua kooperasaun diak ho juventude. Hau la haree sira nu’udar grupu A ka B, maibé hau haree sira nu’udar povu Bobonaru, liuliu juventude ne’ebé iha kreatividade atu hakiak ikan iha fatin barak, liuliu ikan bee-midar nian,” nia dehan.
Paulo Moniz Maia mos hato’o apresiasaun ba juventude sira ne’ebé iha hanoin kreativu no inisiativa rasik atu kria oportunidade ekonomia, no konsidera atividade ne’e nu’udar kontribuisaun ba dezenvolvimentu sustentável iha futuru Munisípiu Bobonaru.
“Hau, hanesan Presidente Autoridade, agradese ba juventude sira ne’ebé iha hanoin diak no kreatividade. Liuhusi sira nia talentu no inisiativa, sira bele kontribui ba ekonomia no dezenvolvimentu sustentável ba futuru Munisípiu Bobonaru,” nia konklui.
Jornalista: Aniceto da Silva
