Maliana, 01 Outubru 2026 — Movimentu Kamponeza Timor-Leste (MOKATIL) hetan kritika tanba fornesimentu merenda eskolar ba estudante sira iha Eskola Bázika Centrál (EBC) Victor Santa, Maliana, la tuir menu indikativu ne’ebé determina ona. Kondisaun ne’e hamosu preokupasaun kona-ba qualidade no diversidade merenda ne’ebé fornese ba estudante sira.
EBC Victor Santa, Postu Administrativu Maliana, Munisípiu Bobonaro, identifika problema kona-ba qualidade modo no na’an ne’ebé fornese hosi MOKATIL iha 14 Setembru 2026.
Diretor EBC Victor Santa, Gilermino Moniz, hatete katak iha loron 14 Setembru, MOKATIL entrega merenda ba eskola, maibé balu sasan la tuir menu no la kumpri kondisaun qualidade ne’ebé esperadu.
Nia esplika katak sasan sira ne’e entrega iha tempu kalan. Bainhira diresaun eskola haree sasan sira iha dader, identifika katak balu modo no na’an la iha kondisaun di’ak atu prepara ba estudante sira.
“Modo ne’ebé la kualidade no na’an ne’ebé dodok ne’e ami la tein ba estudante sira,” dehan Diretor EBC Victor Santa, Gilermino Moniz, ba jornalista media tour sira iha nia fatin servisu,
Nia hatete katak, iha loron ne’ebá kedas, diresaun eskola kontaktu koziñeira sira no MOKATIL atu informa kona-ba problema ne’ebé identifika ona.
Tuir nia, MOKATIL responde ba problema ne’e ho substituisaun sasan ne’ebé konsidera la kualidade ho manu-tolun, atu bele kontinua implementasaun programa merenda eskolar.
Diretor EBC Victor Santa mos esplika katak, depois hosi problema ne’e, implementasaun programa merenda eskolar komesa lao tuir menu ne’ebé trasa ona hosi programa edukasaun.
“Agora dadaun, sira kumpri ona menu ne’ebé trasa tiha ona, no ida ne’e tuir menu Edukasaun,” nia hatete.
Gilermino subliña katak responsabilidade eskola la’ós de’it simu merenda, maibé mos halo monitorizasaun ba qualidade sasan, menu no prosesu entrega. Bainhira iha problema, eskola halo komunikasaun diretamente ho koziñeira no forne¬sedor atu buka solusaun.
Nia hatete katak monitorizasaun importante atu garante merenda ne’ebé fornese ba estudante sira tuir menu ne’ebé estabelese no iha kondisaun di’ak atu konsumu.
“Ami kontinua halo koordenasaun ho parte relevante sira no kompanhia forne¬sedor atu garante implementasaun programa merenda eskolar lao ho di’ak no tuir orientasaun ne’ebé determina hosi programa Edukasaun,” nia konklui.
Autoridade Munisipál Hapar Fornesimentu MOKATIL
Enkuantu, Presidente Autoridade Munisipál Bobonaro, Paulo Moniz Maia, hatete katak, liu hosi Primeiru-Ministru, autoridade munisipál sira simu orientasaun atu produtu lokal, inklui batar, uza ba programa merenda eskolar iha eskola sira iha Munisípiu Bobonaro.
Nia hatete katak bazeia ba orientasaun Primeiru-Ministru, Autoridade Munisipál Bobonaro halo reuniaun iha Dili no kontaktu MOKATIL atu fornese merenda eskolar ba eskola sira iha Munisípiu Bobonaro, liuliu iha Postu Administrativu Maliana.
“Bazeia ba Primeiru-Ministru nia hanoin, produtu batar Kay Rala ne’e oferese ba merenda eskolar iha Timor-Leste tomak. Tanba ne’e, hau bolu MOKATIL atu fornese merenda eskolar mai iha Munisípiu Bobonaro. Presidente MOKATIL mai no hala’o forne¬simentu merenda eskolar ba estudante sira iha Bobonaro laran tomak, liuliu iha Postu Maliana,” dehan Paulo Moniz Maia.
Maibé, nia hatete katak bainhira MOKATIL hahú ezekuta programa merenda eskolar, komunidade, inklui inan-aman no profesór sira, halo kritika tanba iha produtu ne’ebé la iha kondisaun di’ak atu fó ba estudante sira.
“Bainhira nia ezekuta merenda eskolar, primeiru nia fornese modo tahan ne’ebé at. Entaun, halo kritika no protestu hosi inan-aman no profesór sira. Sira la simu kompaña ida ne’e,” nia hatete.
Paulo Moniz Maia mos hatete katak, alende problema ho modo, iha mos limitasaun kona-ba quantidade no preparasaun merenda, inklui uza mina ne’ebé la sufisiente ba quantidade estudante sira ne’ebé simu merenda.
Tanba problema sira ne’e, Presidente Autoridade Munisipál Bobonaro hatete katak nia desizaun atu fó kontratu ba MOKATIL ba períodu fulan rua la kontinua iha fulan Setembru.
Tuir nia, fornesimentu merenda eskolar kontinua ho kompanhia ne’ebé antes fornese, EJP, enquanto MOKATIL hetan oportunidade atu hadi’a nia sistema no prepara rekursu sira.
“Tanba ne’e, kontratu ne’e hau fó fulan rua de’it. Iha Setembru agora nia la kontinua ona, nafatin kontinua ho grupu ida naran EJP. MOKATIL, hau dehan la’ós hapara permanentemente, maibé o hadia o nia an lai, prepara o nia fundus lai. Depois fulan rua, tolu, ka tinan foun 2027, hau bele bolu fali ita-boot. Karik ita-boot la hadia ita nia sistema, ita sei la bele fornese merenda eskolar iha Munisípiu Bobonaro. Tanba ne’e, iha Setembru hau hapara tiha nia ona,” nia hakotu
Jornalista: Aniceto da Silva
